ന്യൂഡൽഹി: ദേശീയ പാത 183 എയുടെ പുതിയ വിശദ പദ്ധതി റിപ്പോർട്ട് (ഡിപിആർ) തയ്യാറാക്കി വരുന്നതായി കേന്ദ്ര റോഡ് ഗതാഗത വകുപ്പ് മന്ത്രി നിതിൻ ഗഡ്കരി ആന്റോ ആന്റണി എംപിയുടെ ചോദ്യത്തിന് ലോക് സഭയിൽ മറുപടി നൽകി. നിലവിലെ ഡി പി ആർ ആറ് വർഷം മുൻപ് തയ്യാറാക്കിയതാണ്. അതിനാലാണ് പുതിയ ഡി പി ആർ തയ്യാറാക്കുന്നത്. നിർദ്ദിഷ്ട ദേശീയ പാത-183 എയ്ക്കുള്ള ഭൂമി ഏറ്റെടുക്കൽ ഇതുവരെ ആരംഭിച്ചിട്ടില്ല. പദ്ധതിക്കുള്ള സ്ഥലമേറ്റെടുപ്പ് സംസ്ഥാന സർക്കാരിന്റെ ചുമതലയാണ്.
നിലവിലെ ഡി പി ആർ അനുസരിച്ച് ഏഴ് ബൈപ്പാസുകളാണ് നിർദ്ദേശിച്ചിരുന്നത്. ഗതാഗത ആവശ്യകതകൾ, റോഡ് സുരക്ഷ, പ്രാദേശിക സാഹചര്യങ്ങൾ എന്നിവയെ അടിസ്ഥാനമാക്കി ബൈപ്പാസുകൾക്കായുള്ള വ്യവസ്ഥകൾ പുതിയ ഡി പി ആർ ഘട്ടത്തിൽ പരിഗണിക്കും. പദ്ധതി പൂർത്തീകരിക്കുന്നതിന് കണക്കാക്കിയ ചെലവും സമയപരിധിയും ഡി പി ആറിന്റെ അംഗീകാരത്തിന് ശേഷമേ വ്യക്തമാവുകയുള്ളൂവെന്നും മന്ത്രി ആന്റോ ആന്റണി എംപി യെ അറിയിച്ചു.
