തിരുവനന്തപുരം : ന്യൂനപക്ഷ സ്കോളര്ഷിപ് വിഷയത്തില് യു.ഡി.എഫില് ധാരണാപിശകില്ലെന്ന് ഉമ്മന്ചാണ്ടി. എല്ലാവര്ക്കും തൃപ്തികരമായ തീരുമാനം ഉടനുണ്ടാകുമെന്നും അദ്ദേഹം മാധ്യമങ്ങളോട് പ്രതികരിച്ചു. അതേസമയം, വിഷയത്തില് അഭിപ്രായ ഐക്യമുണ്ടാക്കാന് യു.ഡി.എഫില് തിരക്കിട്ട ചര്ച്ചകള് പുരോഗമിക്കുകയാണ്. കെ.പി.സി.സി അധ്യക്ഷന് കെ.സുധാകരന് പാര്ട്ടിയിലെയും ഘടകകക്ഷികളുടെയും മുതിര്ന്ന നേതാക്കളുമായി ഇന്ന് വിശദമായ ആശയവിനിമയം നടത്തും.
അതേസമയം, വിഷയത്തില് പരസ്യ പ്രസ്താവനകള്ക്ക് കോണ്ഗ്രസ് പൂട്ടിട്ടു. യു.ഡി.എഫിലെ ഐക്യമില്ലായ്മ മുഖ്യമന്ത്രി മുതലെടുത്ത പശ്ചാത്തലത്തില് മുന്നണി നിലപാട് ഇനി വൈകരുതെന്നാണ് മുതിര്ന്ന നേതാക്കളുടെ അഭിപ്രായം. യു.ഡി.എഫ് നിലപാട് ഉടന് അറിയിക്കുമെന്നും പുതിയ സ്കീം സര്ക്കാരിന് സമര്പ്പിക്കുമെന്നുമാണ് കെ.സുധാകരന് അറിയിച്ചിട്ടുള്ളത്.
ഇതിനായി പാര്ട്ടിയിലെയും ഘടകകക്ഷികളുടെയും മുതിര്ന്ന നേതാക്കളുമായി സുധാകരന് ആശയവിനിമയം തുടങ്ങി. ലീഗിന്റെ നിലപാടിനോട് പൂര്ണമായി യോജിക്കുന്നത് ക്രിസ്ത്യന് ന്യൂനപക്ഷങ്ങളുടെ പിന്തുണ നഷ്ടപ്പെടുന്നതിന് കാരണമാകുമെന്ന് കോണ്ഗ്രസിലെ ഒരു വിഭാഗം നേതാക്കള് നേതൃത്വത്തെ അറിയിച്ചിട്ടുണ്ട്.