വിതുര : ഓട്ടോയില് യാത്രചെയ്യുകയായിരുന്ന വീട്ടമ്മയെ പീഡിപ്പിക്കാന് ശ്രമിച്ച ഡ്രൈവര് അറസ്റ്റില്. വിതുര കലുങ്ക് ജംഗ്ഷന് സ്റ്റാന്ഡിലെ ഓട്ടോ ഡ്രൈവര് തള്ളച്ചിറ സന്ധ്യാഭവനില് സുനിയാണ് (32) അറസ്റ്റിലായത്. വിതുര മൈലക്കോണം സ്വദേശിയായ വീട്ടമ്മയേയാണ് ഇയാള് പീഡിപ്പിക്കാന് ശ്രമിച്ചത്. കഴിഞ്ഞ ദിവസം വൈകിട്ട് അഞ്ചിന് വിതുര സ്റ്റാന്ഡില് നിന്നും മാര്ക്കറ്റ് ജംഗ്ഷനിലെ മൊബൈല്ഷോപ്പിലേക്ക് യുവതി ഓട്ടം വിളിച്ചു.
എന്നാല് മൊബൈല് ഷോപ്പിന് മുന്നില് നിറുത്താതെ പട്ടന്കുളിച്ചപാറ മേഖലയിലേക്ക് സുനി യുവതിയെ കൊണ്ടുപോകുകയായിരുന്നു. ആളൊഴിഞ്ഞ പ്രദേശത്തെത്തിയപ്പോള് സുനി വീട്ടമ്മയുടെ കൈയില് കയറിപ്പിടിച്ചു. യുവതി നിലവിളിച്ചുകൊണ്ട് ഓട്ടോയില് നിന്നും ഓടി രക്ഷപ്പെട്ടു. സംഭവം ശ്രദ്ധയില്പ്പെട്ട നാട്ടുകാര് പോലീസില് വിവരം അറിയിച്ചു. ഇതിനുപിന്നാലെ ഓട്ടോയുമായി മുങ്ങിയ സുനിയെ ഇന്നലെ രാവിലെ വിതുര സ്റ്റാന്ഡിലെത്തിയപ്പോള് സി.ഐ എസ്. ശ്രീജിത്ത്, എസ്.ഐ എസ്.എസ്. സുധീഷ് എന്നിവര് ഉള്പ്പെട്ട സംഘം അറസ്റ്റുചെയ്യുകയായിരുന്നു. പ്രതിയെ കോടതി റിമാന്ഡ് ചെയ്തു.