ഏനാത്ത് : അപകടം ഒഴിയാതെ മിസ്പപടി. അമിത വേഗവും അലക്ഷ്യമായ ഡ്രൈവിങ്ങും അപകടത്തിന് കാരണമാകുന്നുണ്ട്. പാലം മുതൽ എംജി ജംഗ്ഷന് വരെയുള്ള ഭാഗത്ത് കാൽനട യാത്രക്കാരും സൈക്കിൾ യാത്രികരും അപകടത്തിൽ മരിച്ചിട്ടുണ്ട്. മിസ്പ പടിയിൽ നിന്ന് ദേശകല്ലുമൂട് ഭാഗത്തേക്കുള്ള ഉപ റോഡും അപകട കെണിയാണ്. എംസി റോഡിലൂടെ വരുന്ന വാഹനങ്ങളുടെ ഗതി മനസ്സിലാക്കാതെയാണ് ഉപ റോഡിൽ നിന്ന് വരുന്ന വാഹനങ്ങൾ എം സി റോഡിൽ പ്രവേശിക്കുന്നത്. ഇക്കാരണത്താലുണ്ടാകുന്ന കൂട്ടിയിടിയും പതിവാണ്.
മിസ്പ പടി കഴിഞ്ഞാൽ പെട്രോൾ പമ്പിന് വടക്ക് ഉപ റോഡ് ചേരുന്ന ഭാഗവും എംജി ജംഗ്ഷനും സ്ഥിരം അപകട മേഖലയാണ്. അനവസരത്തിൽ വാഹനങ്ങൾ മറികടക്കുന്നതും ഇവിടെ തുടർച്ചയായി അപകടത്തിനു കാരണമാകുന്നു. പാലം മുതൽ എംജി ജംഗ്ഷന് വരെയുള്ള ഭാഗത്ത് പുലർകാല അപകടങ്ങളും ദീർഘദൂര യാത്രയ്ക്കിടയിൽ വാഹനങ്ങൾ വൈദ്യുതി തൂണിലും റോഡരികിലെ മതിൽ സുരക്ഷാ വേലി എന്നിവയിലിടിച്ചുണ്ടാകുന്ന അപകടങ്ങളും പതിവാണ്.
