വിഴിഞ്ഞം : കാപ്പാ നിയമപ്രകാരം ജയിലിലായിരുന്നഗുണ്ട ജാമ്യത്തിലിറങ്ങി സഹോദരനുമായി ചേര്ന്ന് അയല്വാസിയെ വെട്ടിവീഴ്ത്തി. നാട്ടുകാര് സംഘടിച്ച് ഗുണ്ടയെയും പ്രശ്നക്കാരനായ അനുജനെയും വെട്ടി. പരിക്കേറ്റ മൂന്ന് പേരെയും മെഡിക്കല് കോളജ് ആശുപത്രിയില് ചികിത്സയിലാണ്. ശനിയാഴ്ച രാത്രി പത്തോടെ വിഴിഞ്ഞം കോട്ടുകാല് പുത്തളത്തായിരുന്നു സംഭവം. പുത്തളം അമ്പലത്തട്ട് വീട്ടില് രാഘുല് രാജ് (പൊന്മാന് രാജ് 28), ഇയാളുടെ അനുജന് ഷാഹുല് രാജ് (26) ഇവരുടെ ആക്രമണത്തില് പരിക്കേറ്റ പുത്തളം ഉത്രാടം വീട്ടില് വിധുക്കുട്ടന് (50) എന്നിവരാണ് ചികിത്സയില് കഴിയുന്നത്.
ഇരുപത്തിരണ്ടോളം കേസിലെ പ്രതിയായ രാഘുല് രാജ് കാഞ്ഞിരംകുളം പോലീസ് സ്റ്റേഷല് ഗുണ്ടാലിസ്റ്റില്പ്പെട്ട ആളാണ്. ഗുണ്ടാ നിയമപ്രകാരം ജയിലില് ആയിരുന്ന ഇയാള് കഴിഞ്ഞ മാസമാണ് ജാമ്യത്തിലിറങ്ങിയത്. 2020 ല് സിനിമാ നടന് സൂര്യയുടെ ഫ്ലക്സ് ബോര്ഡ് സ്ഥാപിച്ചതുമായി ബന്ധപ്പെട്ട തര്ക്കത്തെ തുടര്ന്ന് വിധുക്കുട്ടന്റെ മകന് അനന്ദുവിനെ രാഘുല് രാജും സംഘവും ആക്രമിച്ചിരുന്നു. ഇവരുടെ അനുവാദമില്ലാതെ ഫ്ലക്സ് സ്ഥാപിച്ചെന്നാരോപിച്ചായിരുന്നു അന്നത്തെ സംഘര്ഷം.
