ഒഡീഷ : ഒഡീഷയിൽ യുവതികള്ക്കു നേരെ ലൈംഗികാതിക്രമം നടത്തിയ റെയിൽവെ പോലീസ് ഉദ്യോഗസ്ഥൻ നാട്ടുകാരുടെ മർദനത്തിന് പിന്നാലെ മരിച്ചു. റെയിവെ പോലീസ് കോണ്സ്റ്റബിള് സൗമ്യ രഞ്ജൻ ആണ് മരിച്ചത്. കഴിഞ്ഞ ദിവസമാണ് സംഭവം. രണ്ട് യുവതികളോട് ഇയാളും സുഹൃത്തും ലൈംഗികാതിക്രമണം നടത്തിയിരുന്നു. പിന്നാലെയാണ് നാട്ടുകാർ മർദനത്തിനിരയാക്കിയത്. രാമചന്ദ്രപുര പാലത്തിന് സമീപം രാവിലെ 11.30ഓടെയാണ് സംഭവം നടക്കുന്നതെന്ന് പി ടി ഐ റിപ്പോർട്ട് ചെയ്തു. ബൈക്കിലെത്തിയ രണ്ടു പേർ സ്കൂട്ടിയിൽ സഞ്ചരിച്ച യുവതികളെ പിന്തുടരുകയും പിന്നീട് ഇരുവരെയും ഇടിച്ചിടുകയുമായിരുന്നുവെന്ന് പോലീസിന് നൽകിയ പരാതിയിൽ പറയുന്നു.
പിന്നീട് ഇരുവരുടെ നേരെ ലൈംഗികാതിക്രമം നടത്തുകയായിരുന്നുവെന്ന് പോലീസ് പറഞ്ഞു. യുവതികള് അലറി വിളിക്കുകയും പെട്ടെന്ന് തന്നെ ആളുകള് കൂട്ടം കൂടുകയായിരുന്നു. പോലീസ് എത്തുന്നതിന് മുൻപ് ഇരുവരെയും ആള്ക്കൂട്ടം മർദനത്തിനിരയാക്കി. പോലീസാണ് ഇരുവരയെും ആശുപത്രിയിൽ പ്രവേശിപ്പിച്ചത്. ഇവരെ മർദിക്കുന്നതിൻ്റെ വീഡിയോ സമൂഹമാധ്യമത്തിൽ വ്യാപകമായി പ്രചരിച്ചിരുന്നു.
