പാലക്കാട് : രോഗിയുടെ കൂട്ടിരുപ്പുകാരന്റെ ഫോണുകളും അക്കൗണ്ടില് നിന്ന് പണവും തട്ടിയെടുത്ത കുപ്രസിദ്ധ മോഷ്ടാവ് പോലീസ് പിടിയില്. മുണ്ടൂര് നാമ്പുള്ളിത്തറ പന്നമലവീട്ടില് രമേഷിനെയാണ് (38) ടൗണ് സൗത്ത് പോലീസ് പിടികൂടിയത്. ഈ മാസം 12നാണ് ജില്ലാ വനിതാ ശിശു ആശുപത്രിയില് മോഷണം നടന്നത്. ഭാര്യയെ പ്രസവത്തിനായി പ്രവേശിപ്പിച്ച് പുറത്ത് വിശ്രമിക്കുകയായിരുന്ന താണിശ്ശേരി സ്വദേശി രാജുവിന്റെ പക്കല് നിന്ന് 48,500 രൂപ വിലവരുന്ന മൂന്നു മൊബൈല് ഫോണും 2,200 രൂപയുമാണ് രമേഷ് മോഷ്ടിച്ചത്.
തുടര്ന്ന് ഫോണ് ലോക്ക് തുറന്ന് പോലീസെന്ന വ്യാജേന ഫോണ് കണ്ടെത്തിയെന്ന് രാജുവിനെ അറിയിച്ചു. ബാങ്ക് അക്കൗണ്ടില് നിന്ന് പണം നഷ്ടപ്പെട്ടെന്നും ഗൂഗിള്പേ വഴി പണം തിരികെപ്പിടിക്കാന് പാസ് വേഡ് വേണമെന്നും ധരിപ്പിച്ചു. ഇതു നല്കിയതോടെ മോഷ്ടാവ് 20,000 രൂപ പിന്വലിച്ചു. ഇയാള്ക്കെതിരെ സൗത്ത് സ്റ്റേഷനില് നാലു കേസുകളും നോര്ത്ത്, ഒറ്റപ്പാലം, കോങ്ങാട് സ്റ്റേഷനുകളില് രണ്ടുവീതം മോഷണക്കേസുകളും നിലവിലുണ്ട്. തമിഴ്നാട്ടിലെ വിവിധ സ്റ്റേഷനുകളിലും കേസുകളുണ്ട്. പാലക്കാട് നഗരത്തില് നിന്ന് കഴിഞ്ഞദിവസം രാത്രിയില് ആണ് ഇയാളെ അറസ്റ്റു ചെയ്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
