മലപ്പുറം: മലപ്പുറത്ത് മൊബൈല് ഫോണ് നന്നാക്കി നല്കാത്തതിന് മൊബൈല് കടയുടമ വിദ്യാര്ഥിക്ക് 9,200 രൂപ നഷ്ടപരിഹാരം നല്കാന് ഉപഭോക്തൃ തര്ക്ക പരിഹാര കമീഷന് വിധി. ചങ്ങനാശേരി എന്എസ്എസ് കോളേജിലെ രണ്ടാം വര്ഷ ബിരുദ വിദ്യാര്ഥിയും പറപ്പൂര് കുളത്തിങ്ങല് സ്വദേശിയുമായ പങ്ങിണിക്കാട്ട് റഹീസിനാണ് നഷ്ട പരിഹാരം ലഭിച്ചത്.
റഹീസ് ഡിസ്പ്ലേ തകരാറിലായ മൊബൈല് നന്നാക്കാനായി തിരൂരിലെ ഒരു കടയില് ഏല്പിച്ചിരുന്നു. ഫോണ് നന്നാക്കാനായി 2,200 രൂപയും കടയുടമ ഈടാക്കി. പുതിയ ഡിസ്പ്ലേയ്ക്ക് വാറന്റിയുണ്ടെന്നും പറഞ്ഞിരുന്നു. എന്നാല് മാറ്റിയ ശേഷവും ഡിസ്പ്ലേ ശരിയാകാത്തതിനാല് വീണ്ടും ശരിയാക്കി കിട്ടാനായി സമീപിച്ചപ്പോള് കട ഉടമ ഒഴിഞ്ഞുമാറുകയും പോയി കേസ് കൊടുക്കനും പറഞ്ഞു. ഇതോടെയാണ് റഹീസ് പരാതിയുമായി ഉപഭോക്തൃ തര്ക്ക പരിഹാര കമീഷനെ സമീപിച്ചത്. പരാതിയില് അന്വേഷണം നടത്തിയ ഉപഭോക്തൃ കമ്മിഷന് കടയുടമയുടെ ഭാഗത്ത് വീഴ്ച സംഭവിച്ചതായി കണ്ടെത്തി. തുടര്ന്നാണ് നഷ്ടപരിഹാരം നല്കാന് വിധിച്ചത്.
