ന്യൂഡല്ഹി : പ്രധാനമന്ത്രി നരേന്ദ്ര മോദി ഇന്ന് രാത്രി റഷ്യന് പ്രസിഡന്റ് വ്ലാദിമിര് പുടിനുമായി സംസാരിക്കും. സംഘര്ഷം പരിഹരിക്കാന് ഇന്ത്യ ഇടപെടണമെന്ന് യുക്രെയ്നും യൂറോപ്യന് യൂണിയനും ഇന്ത്യയോട് അഭ്യര്ത്ഥിച്ചിരുന്നു ഇതിനു പിന്നാലെയാണ് മോദിയുടെ നിര്ണായക നീക്കം. പ്രധാനമന്ത്രിയുടെ അധ്യക്ഷതയില് കേന്ദ്രമന്ത്രിസഭയുടെ സുരക്ഷാ കൗണ്സില് യോഗം ചേരുകയാണ്. പ്രധാനമന്ത്രിയുടെ വസതിയില് ചേരുന്ന യോഗത്തില് ആഭ്യന്തരമന്ത്രി അമിത് ഷാ, പ്രതിരോധമന്ത്രി രാജ്നാഥ് സിംഗ്, ധനമന്ത്രി നിര്മല സീതാരാമന് തുടങ്ങിയവര് പങ്കെടുക്കുന്നുണ്ട്.
പുടിനുമായി പ്രധാനമന്ത്രി നരേന്ദ്ര മോദി സംസാരിക്കണമെന്ന് യുക്രെയ്ന് അംബാസിഡര് ഇഗോര് പൊളീഖ അഭ്യര്ഥിച്ചിരുന്നു. നേരത്തെ യൂറോപ്യന് യൂണിയന് വിദേശകാര്യ പ്രതിനിധി ജോസഫ് ബോറേല് ഫോണ്ടെലസ് കേന്ദ്ര വിദേശകാര്യ മന്ത്രി എസ്.ജയശങ്കറെ ഫോണില് വിളിച്ച് സംസാരിച്ചിരുന്നു. യുക്രെയ്നില് യുദ്ധം തടയുന്നതിനുള്ള ശ്രമങ്ങള്ക്ക് ഇന്ത്യയുടെ ഭാഗത്തു നിന്നുള്ള സഹകരണം എങ്ങനെയായിരിക്കുമെന്നാണ് യൂറോപ്യന് യൂണിയന് ആരാഞ്ഞത്.
ഗൂഗിള് മാപ്പ് നോക്കി ബോംബ് ഷെല്ട്ടറുകളില് അഭയം തേടണമെന്ന് യുക്രെയ്നിലുള്ള ഇന്ത്യക്കാര്ക്ക് ഇന്ത്യന് എംബസിയുടെ നിര്ദ്ദേശം. യുക്രൈനില് റഷ്യ നടത്തുന്ന ആക്രമണം രൂക്ഷമായ സാഹചര്യത്തിലാണ് എംബസി മുന്നറിയിപ്പ് നല്കിയത്. ഇന്ന് വൈകുന്നേരം അഞ്ചിനാണ് പുതിയ മുന്നറിയിപ്പ് നല്കിയിരിക്കുന്നത്. ചിലസ്ഥലങ്ങളില് ബോംബ് ആക്രമണത്തിന്റെ മുന്നറിയിപ്പുകള് കേള്ക്കുന്നുണ്ടെന്ന് അറിയാം. ഇത്തരമൊരു സാഹചര്യം നേരിടേണ്ടി വന്നാല് ഭൂഗര്ഭ മെട്രോകളില് സ്ഥിതിചെയ്യുന്ന ബോംബ് ഷെല്ട്ടറുകള് ഗൂഗിള് മാപ്പ് നോക്കി കണ്ടെത്തി സുരക്ഷിതരാകുക- എന്നാണു എംബസി അറിയിച്ചിരിക്കുന്നത്. യുക്രെയ്നില് ഏകദേശം 18,000 ഇന്ത്യക്കാരുണ്ട് അവരില് പലരും വിദ്യാര്ഥികളാണ്. ഇന്ത്യക്കാരെ ഒഴിപ്പിക്കാന് രാവിലെ 7:30 ന് അയച്ച എയര് ഇന്ത്യ വിമാനം യുക്രെയ്ന് വ്യോമാതിര്ത്തി അടച്ചതിനെത്തുടര്ന്ന് മടങ്ങേണ്ടി വന്നിരുന്നു.