കൊച്ചി : മോഫിയ ആത്മഹ്യ ചെയ്ത കേസില് ഭര്ത്താവും കുടുംബവും കസ്റ്റഡിയില്. കോതമംഗലത്തെ ബന്ധുവീട്ടില് ഒളിവില് കഴിയുകയായിരുന്നു ഇവര്. ഭര്ത്താവ് സുഹൈല്, ഭര്ത്താവിന്റെ അച്ഛന്, അമ്മ എന്നിവര്ക്കെതിരെയാണ് ആത്മഹത്യാ പ്രേരണ കുറ്റത്തിനാണ് പോലീസ് കേസെടുത്തിരിക്കുന്നത്.
മോഫിയയുടെയും സുഹൈലിന്റെയും പ്രണയവിവാഹമായിരുന്നു. എന്നാല് വിവാഹം കഴിഞ്ഞ് കുറച്ച് ദിവസങ്ങള്ക്കുള്ളില്ത്തന്നെ കൂടുതല് സ്ത്രീധനം വേണമെന്ന് പറഞ്ഞ് മോഫിയയെയും കുടുംബത്തെയും ഭര്തൃവീട്ടുകാര് ബുദ്ധിമുട്ടിച്ച് തുടങ്ങി. ഇതോടെ സുഹൈലിനെതിരെ മോഫിയ ഒരു മാസം മുമ്പ് ആലുവ റൂറല് എസ്.പി ക്ക് പരാതി നല്കി. ശാരീരികമായി ഉപദ്രവിക്കുന്നുവെന്നും വന് തുക സ്ത്രീധനം ആവശ്യപ്പെട്ട് ഭീഷണിപ്പെടുത്തുകയാണെന്നും പരാതിയിലുണ്ട്. എന്നാല് ഒരു നടപടിയും പോലീസ് സ്വീകരിച്ചിരുന്നില്ല. പരാതികള് പല സ്റ്റേഷനുകള്ക്ക് കൈമാറി വീട്ടുകാരെ വട്ടം കറക്കുകയാണ് പോലീസ് ചെയ്തത്.
ഒടുവില് ദേശീയ വനിതാ കമ്മീഷന് നല്കിയ പരാതിയില് അന്വേഷണം എത്തിയപ്പോഴാണ് കഴിഞ്ഞ ദിവസം രാവിലെ ആലുവ ഈസ്റ്റ് സിഐ സുധീര് ഇരുവീട്ടുകാരെയും ചര്ച്ചക്ക് വിളിച്ചത്. എന്നാല് ചര്ച്ചക്കിടെ സുധീര് പെണ്കുട്ടിയേയും അച്ഛനെയും അവഹേളിക്കുന്ന രീതിയിലാണ് പെരുമാറിയെതെന്ന് വീട്ടുകാര് പറയുന്നു. ഉച്ചയോടെ ഇരു വീട്ടുകാരും സ്റ്റേഷനില് നിന്ന് മടങ്ങി. പിന്നീട് വൈകിട്ട് ഏഴ് മണിയോടെ സ്വന്തം വീട്ടിലെ കിടപ്പ് മുറിയില് യുവതിയെ തൂങ്ങിമരിച്ച നിലയിലാണ് വീട്ടുകാര് കാണുന്നത്. ഭര്ത്താവിനും ആലുവ സിഐക്കുമെതിരെ ഗുരുതര ആരോപണങ്ങള് ആത്മത്യാക്കുറിപ്പ് എഴുതി വെച്ചാണ് മോഫിയ ജീവനൊടുക്കിയത്. സിഐയെ സ്റ്റേഷന് ചുമതലയില് നിന്ന് മാറ്റിയെന്നും സിഐക്കെതിരെ ഉയര്ന്ന ആരോപണങ്ങളില് അടക്കം ഡി.വൈ.എസ്.പി അന്വേഷിക്കുമെന്നും ആലുവ റൂറല് എസ്.പി കാര്ത്തിക്ക് അറിയിച്ചിട്ടുണ്ട്.
രണ്ട് മാസം മുമ്പാണ് സുഹൈല് മോഫിയയ്ക്ക് തലാഖ് ചൊല്ലി നോട്ടീസയക്കുന്നതെന്ന് കുടുംബം പറയുന്നു. ഇതോടൊപ്പം 2500 രൂപയും അയച്ചിരുന്നു. വിവാഹമോചനശേഷം മതാചാരപ്രകാരമുള്ള ഇദ്ദ ഇരിക്കാനാണ് പണം അയച്ചത്. ഇതും പരാതിയായി പോലീസിന് നല്കിയിരുന്നതാണ്. എന്നാല് പോലീസ് ഗാര്ഹികപീഡനമടക്കം ഒരു പരാതിയും കാര്യമായി എടുത്തില്ലെന്ന് മോഫിയ പര്വീണിന്റെ അച്ഛന് പറയുന്നു.
