തിരുവനന്തപുരം: വിവാഹ വാഗ്ദാനം നല്‍കി മലയാളി യുവതിയുടെ 22 ലക്ഷം തട്ടിയ ത്രിപുര സ്വദേശികള്‍ അറസ്റ്റില്‍. മാട്രിമോണിയല്‍ സൈറ്റിലൂടെ പരിചയപ്പെട്ടാണ് തട്ടിപ്പ് നടത്തിയത്. കുമാര്‍ ജമാത്യ (36), സൂരജ് ദബര്‍ണ (27), സജിത് ജമാത്യ (40) എന്നിവരാണ് പിടിയിലായത്. തിരുവനന്തപുരം സൈബര്‍ പോലീസ് ഇവരെ അറസ്റ്റ് ചെയ്തത്. തിരുവനന്തപുരം സ്വദേശിനിയായ യുവതിയെ ആണിവര്‍ കബളിപ്പിച്ച് പണം തട്ടിയത്.
യുവതിയെ മാട്രിമോണിയല്‍ സൈറ്റിലൂടെ പരിചയപ്പെട്ട് യു.എന്‍ മിഷനില്‍ ഡോക്ടറെന്ന് വിശ്വസിപ്പിച്ചായിരുന്നു വിവാഹ വാഗ്ദാനം. വിശ്വാസത്തിനായി ചിത്രവും വാട്‌സ് ആപ് നമ്പറും നല്‍കി. തുടര്‍ന്ന് വാട്‌സ് ആപിലൂടെ സന്ദേശങ്ങള്‍ അയച്ചു. ജോലിക്കാവശ്യമായ ഉപകരണങ്ങള്‍ വാങ്ങാനെന്ന് വിശ്വസിപ്പിച്ചാണ് പല തവണയായി യുവതിയില്‍നിന്ന് പണം തട്ടിയത്. തുടര്‍ച്ചയായി പണമാവശ്യപ്പെട്ടതോടെ കഴിഞ്ഞ മേയില്‍ യുവതി സൈബര്‍ സെല്ലില്‍ പരാതി നല്‍കുകയായിരുന്നു. അന്വേഷണത്തില്‍ പണമയച്ചുനല്‍കിയ അക്കൗണ്ട് ത്രിപുരയിലാണെന്ന് കണ്ടെത്തി. ബാങ്ക് അക്കൗണ്ട് ഉടമകളെ അന്വേഷിച്ചാണ് പോലീസ് പ്രതികളിലേക്കെത്തിയത്. അറസ്റ്റിലായ പ്രതികളെ അഗര്‍ത്തലയിലെത്തിച്ച് കോടതിയില്‍ ഹാജരാക്കിയശേഷം തിരുവനന്തപുരത്ത് എത്തിക്കും.
