മുംബൈ : നൂറ് കോടി രൂപയുടെ നിക്ഷേപ തട്ടിപ്പ് നടത്തിയ എസ് കുമാര് ജ്വല്ലറി ഉടമ ശ്രീകുമാര് പിള്ളയെ കണ്ടെത്താനാകാതെ പോലീസ്. നൂറ് കണക്കിന് പേരില് നിന്നായി കോടിക്കണക്കിന് രൂപ നിക്ഷേപം സ്വീകരിച്ച ശേഷം മുങ്ങിയ മലയാളി വ്യവസായി ഒളിവിലാണെന്നാണ് പോലീസിന്റെ വിശദീകരണം. സ്ഥിരം നിക്ഷേപങ്ങള്ക്ക് 16 ശതമാനത്തിലധികം പലിശ വാഗ്ദാനം ചെയ്താണ് തട്ടിപ്പ് നടത്തിയത്. 500 രൂപ മുതലുള്ള മാസ ചിട്ടി അടക്കം മൂന്ന് നിക്ഷേപ പദ്ധതികളാണ് എസ് കുമാറിന് ഉണ്ടായിരുന്നത്.
ഒരു ലക്ഷത്തിന് മുകളില് ഒരു വര്ഷത്തേക്ക് നിക്ഷേപിച്ചാല് കിട്ടുക 16 ശതമാനം പലിശയാണ്. 5 വര്ഷത്തിന് മുകളിലുള്ള നിക്ഷേപങ്ങള്ക്ക് ഇരട്ടി തുക നല്കുമെന്നായിരുന്നു വാഗ്ദാനം. ബാങ്കുകളിലടക്കം ഒരിടത്തും കിട്ടാത്ത വന് പലിശ കണ്ട് പണം നിക്ഷേപിച്ചവരില് മലയാളികളും മഹാരാഷ്ട്രക്കാരുമുണ്ട്. ഒരു ലക്ഷം മുതല് 60 ലക്ഷം വരെ നിക്ഷേപിച്ചവരാണ് പലരും. നൂറ് കോടിക്ക് മുകളില് പണം പറ്റിച്ചെന്നാണ് നിക്ഷേപകരുടെ ആരോപണം.കഴിഞ്ഞ ഓഗസ്റ്റില് ജ്വല്ലറി പൂട്ടി. പണം തിരികെ ചോദിച്ച് വന്നവരോട് എല്ലാവരുടേയും പണം തരുമെന്നും ഫണ്ട് റെഡിയാക്കാന് കുറച്ച് സമയം വേണമെന്നുമായിരുന്നു ശ്രീകുമാറിന്റെ മറുപടി.
