തിരുവനന്തപുരം : സംസ്ഥാനത്ത് മങ്കിപോക്സുമായി ബന്ധപ്പെട്ട് ആശങ്കപ്പെടേണ്ട സാഹചര്യം നിലവിലില്ലെന്ന് ആരോഗ്യ വകുപ്പ് മന്ത്രി വീണാ ജോര്ജ്. അതേസമയം, കോവിഡ്-19 മായി ബന്ധപ്പെട്ട് സ്വീകരിച്ചു വരുന്ന മുന്കരുതല് നടപടികളായ മാസ്ക്, സാനിറ്റൈസര് തുടങ്ങിയവ ഈ രോഗത്തെ പ്രതിരോധിക്കുന്നിതിനു വേണ്ടിയും ശക്തമായി തുടരണം. ഇക്കാര്യത്തില് പൊതുജാഗ്രത ഉണ്ടാകണമെന്നും മന്ത്രി പറഞ്ഞു. ജനങ്ങളില് അവബോധം സൃഷ്ടിക്കുന്നതിനും അതോടൊപ്പം ആശങ്കകള് ദൂരീകരിക്കുന്നതിനും എംഎല്എമാരുടെ സഹകരണവും ഇടപെടലുകളും ഉണ്ടാകേണ്ടത് അനിവാര്യമാണെന്നും മന്ത്രി പറഞ്ഞു.
ആലപ്പുഴയില് സംശയിക്കപ്പെട്ട കേസ് നെഗറ്റീവ് ആണ്. ആദ്യ കേസിന്റെ ഏറ്റവും അടുത്ത പ്രൈമറി കോണ്ടാക്ട് ആയ കുടുംബാംഗങ്ങളുടെ റിസള്ട്ട് നെഗറ്റീവ് ആണ്. നിലവില് മങ്കിപോക്സ് സ്ഥിരീകരിച്ച രണ്ട് പേരുടെ ആരോഗ്യ നില തൃപ്തികരമായി തുടരുന്നു. കോണ്ടാക്ടില് ആര്ക്കും രോഗലക്ഷണങ്ങള് ഉണ്ടായതായി റിപ്പോര്ട്ട് ചെയ്തിട്ടില്ല. മങ്കി പോക്സുമായി ബന്ധപ്പെട്ട എല്ലാ മുന്കരുതലുകളും ആരോഗ്യവകുപ്പ് സ്വീകരിച്ചിരുന്നതായും മന്ത്രി വ്യക്തമാക്കി.