കോട്ടയം : ‘എൽഡിഎഫിലെ അതൃപ്തർ ആരെന്ന് കേരള കോൺഗ്രസിന് അറിയില്ല മോന്സ് ജോസഫ്. മുന്നണി വിട്ടുപോയവരെ തിരികെ കൊണ്ടുവരണമെന്നും, എല്ഡിഎഫിലെ അസംതൃപ്തരായ കക്ഷികളുടെ സാഹചര്യം പ്രയോജനപ്പെടുത്തുകയും വേണമെന്ന കോണ്ഗ്രസ് ചിന്തന് ശിബിരത്തിലെ പ്രഖ്യാപനത്തില് പ്രതികരിക്കുകയായിരുന്നു മോന്സ്.
‘എൽഡിഎഫിലെ അതൃപ്തർ ആരെന്ന് കേരള കോൺഗ്രസിന് അറിയില്ല. അങ്ങനെ ആരെങ്കിലും ഉണ്ടെങ്കിൽ അത് കെപിസിസി വ്യക്തമാക്കട്ടെ.യുഡിഎഫ് അടിത്തറ വിപുലീകരിക്കേണ്ടതുണ്ട്. നിലവിൽ ഒരു ചർച്ചകളും യുഡിഎഫിൽ നടന്നിട്ടില്ല. അഭിപ്രായം പറയേണ്ട ഘട്ടത്തിൽ പാർട്ടി ചെയർമാൻ അഭിപ്രായം പറയും. യുഡിഎഫിൽ നിന്ന് ആരെയും പറഞ്ഞു വിട്ടിട്ടില്ല.
യുഡിഎഫിൽ നിന്ന് പോയവരെല്ലാം കൃത്യമായ അജൻഡയുടെ അടിസ്ഥാനത്തിലാണ് പോയത്’ അദ്ദേഹം വ്യക്തമാക്കി. കേരള കോണ്ഗ്രസ് ജോസഫ് വിഭാഗം യുഡിഫിൽ തൃപ്തരല്ലെന്നും ഇടതു മുന്നണിയിലേക്ക് മടങ്ങാന് നീക്കം നടത്തുന്നുമുണ്ടെന്ന ഊഹാപോഹങ്ങളുടെ പശ്ചാത്തലത്തില് കൂടിയാണ് മോന്സ് ജോസഫിന്റെ ഈ പ്രതികരണം.
