ന്യൂഡൽഹി: പസഫിക് സമുദ്രത്തിൽ എൽ നിനോ പ്രതിഭാസം രൂപപ്പെടുന്നതിനാൽ ഇന്ത്യയിൽ കാലവർഷം ദുർബലമാകാൻ സാധ്യതയെന്ന മുന്നറിയിപ്പുമായി കാലാവസ്ഥാ നിരീക്ഷണ കേന്ദ്രങ്ങൾ. ഇക്വറ്റോറിയൽ പസഫിക് മേഖലയിൽ എൽ നിനോ സാഹചര്യങ്ങൾ ഇതിനോടകംതന്നെ പ്രകടമായിട്ടുണ്ടെന്ന് ജപ്പാൻ കാലാവസ്ഥാ ഏജൻസി സ്ഥിരീകരിച്ചിട്ടുണ്ട്. ഇതിന്റെ ഫലമായി ഏഷ്യയുടെ പല ഭാഗങ്ങളിലും വരണ്ട കാലാവസ്ഥയും ഉയർന്ന താപനിലയും അനുഭവപ്പെടാൻ സാധ്യതയുണ്ടെന്ന് ഏജൻസി ചൂണ്ടിക്കാട്ടുന്നു. ഇന്ത്യൻ കാലാവസ്ഥാ വകുപ്പും ഈ വർഷത്തെ കാലവർഷത്തിൽ കുറവുണ്ടാകുമെന്ന് രേഖപ്പെടുത്തിയിട്ടുണ്ട്.
പസഫിക് സമുദ്രോപരിതലത്തിൻ്റെ കിഴക്കുഭാഗത്ത് സാധാരണ ഉള്ളതിനേക്കാൾ ചൂട് കൂടുന്ന അവസ്ഥയാണ് എൽ നിനോ. ഇതിന്റെ ഫലമായി കിഴക്കൻ പസഫിക് മേഖലയിൽ കൂടുതൽ മഴ ലഭിക്കുകയും പടിഞ്ഞാറൻ പ്രദേശങ്ങളിൽ (ഇന്ത്യയുൾപ്പെടെ) മഴ കുറയുന്ന സാഹചര്യം ഉണ്ടാവുകയും ചെയ്യുന്നു. ഇതിനെ എൻസോ (ENSO) അഥവാ എൽ നിനോ സതേൺ ഓസിലേഷൻ എന്ന് വിളിക്കുന്നു. 2026-ൽ രാജ്യത്ത് ലഭിക്കേണ്ട ശരാശരി മഴയുടെ 92 ശതമാനം ലഭിക്കുമെന്നായിരുന്നു ഐഎംഡിയുടെ ഏപ്രിലിലെ പ്രവചനമെങ്കിലും മെയ് 29-ന് പുറത്തുവിട്ട പുതുക്കിയ കണക്കനുസരിച്ച് ഇത് 90 ശതമാനമായി കുറഞ്ഞിട്ടുണ്ട്. രാജ്യത്തെ കൃഷിഭൂമിയുടെ പകുതിയോളം ജലസേചന സൗകര്യത്തിനായി മഴയെ ആശ്രയിക്കുന്നതിനാൽ, കാലവർഷത്തിലെ ഈ കുറവ് കാർഷിക മേഖലയെയും സമ്പദ്വ്യവസ്ഥയെയും പ്രതികൂലമായി ബാധിക്കും.
