തിരുവനന്തപുരം : വിദ്യാഭ്യാസ സ്ഥാപനങ്ങളില് നിന്നു വിനോദയാത്ര പോകുമ്പോള് വാഹനത്തിന്റെ വിവരങ്ങള് മോട്ടര് വാഹന വകുപ്പില് അറിയിക്കണമെന്നു നിര്ദ്ദേശം. ആവശ്യമെങ്കില് മോട്ടര് വാഹനവകുപ്പ് ഉദ്യോഗസ്ഥര് പരിശോധന നടത്തിയ ശേഷമാകും ഇനി വിനോദയാത്ര. എല്ലാ ഹയര്സെക്കന്ഡറി സ്ഥാപനങ്ങള്ക്കും കോളജുകള്ക്കും ഈ അറിയിപ്പ് നല്കണമെന്നാവശ്യപ്പെട്ട് ഉന്നതവിദ്യാഭ്യാസ വകുപ്പു തലവന്മാര്ക്ക് ഗതാഗത കമ്മിഷണര് നിര്ദ്ദേശം കൈമാറി.
വിനോദയാത്രയ്ക്കു മുന്നോടിയായി ആലപ്പുഴയില് ബസിനു മുകളില് പൂത്തിരി കത്തിച്ച് തീ പടര്ന്ന സംഭവത്തെത്തുടര്ന്നാണ് മോട്ടര് വാഹനവകുപ്പിന്റെ കര്ശന നിര്ദ്ദേശം. ഹയര് സെക്കന്ഡറി, സാങ്കേതിക വിദ്യാഭ്യാസം, ആരോഗ്യ വിദ്യാഭ്യാസം തുടങ്ങിയ ഉന്നതവിദ്യാഭ്യാസ ഡയറക്ടര്മാര്ക്കാണ് നിര്ദ്ദേശം കൈമാറിയത്. ചില വിദ്യാഭ്യാസ സ്ഥാപനങ്ങളില് നിന്നുള്ള വിനോദയാത്രയ്ക്കു മുന്പ് ബസിനു രൂപ മാറ്റം വരുത്തുന്നതും ആഡംബര ലൈറ്റ്, അരോചകമായ ശബ്ദം പുറപ്പെടുവിക്കുന്ന ഓഡിയോ സിസ്റ്റം എന്നിവ ഘടിപ്പിക്കുന്നതും പതിവാണ്.
