തൃശൂർ: വായിലെ ക്യാൻസർ മൂർച്ഛിച്ച് ഗുരുതര ആരോഗ്യനിലയിലായിരുന്ന ‘നന്ദു’ എന്ന ആൺകടുവയ്ക്ക് ദയാവധം നടത്തി. വയനാട്ടിൽ നിന്ന് രക്ഷപ്പെടുത്തി പുത്തൂരിലെ തൃശൂർ സുവോളജിക്കൽ പാർക്കിൽ എത്തിച്ച കടുവയായിരുന്നു നന്ദു. വിദഗ്ധ വെറ്ററിനറി ഡോക്ടർമാരുടെ മേൽനോട്ടത്തിൽ ചികിത്സ തുടരുന്നതിനിടെയാണ് രോഗം ഗുരുതരമായത്. ക്യാൻസർ മൂർച്ഛിച്ചതോടെ കടുവയ്ക്ക് ഭക്ഷണം കഴിക്കാൻ പോലും സാധിക്കാത്ത അവസ്ഥയിലായി.
രോഗത്തിന്റെ തീവ്രതയെ തുടർന്ന് കടുത്ത വേദന അനുഭവിക്കുന്ന സാഹചര്യവും ആരോഗ്യനിലയിൽ കാര്യമായ പുരോഗതിക്ക് സാധ്യതയില്ലെന്ന വിദഗ്ധ വെറ്ററിനറി ഡോക്ടർമാരുടെ വിലയിരുത്തലും പരിഗണിച്ചാണ് ദയാവധത്തിന് തീരുമാനിച്ചത്. ചീഫ് വൈൽഡ് ലൈഫ് വാർഡന്റെ ഉത്തരവ് പ്രകാരമായിരുന്നു നടപടികൾ. ദയാവധത്തിന് ശേഷം നന്ദുവിന്റെ മൃതദേഹം മണ്ണുത്തി വെറ്ററിനറി സർവകലാശാലയിൽ എത്തിച്ച് പോസ്റ്റ്മോർട്ടം നടപടികൾ പൂർത്തിയാക്കി.
