കൊച്ചി: മുളന്തുരുത്തി പള്ളിയുടെയുടെ താക്കോല് ഓര്ത്തഡോക്സ് സഭയ്ക്ക് കൈമാറാന് ഹൈക്കോടതി ഉത്തരവ്. രണ്ടാഴ്ചയ്ക്കുള്ളില് താക്കോല് ഓര്ത്തഡോക്സ് സഭയ്ക്ക് കൈമാറാനാണ് ഉത്തരവിട്ടിരിക്കുന്നത്. നേരത്തെ പള്ളി ഏറ്റെടുക്കണമെന്ന് ഹൈക്കോടതി ഉത്തരവിട്ടിരുന്നു. ഇതിന്റെ അടിസ്ഥാനത്തില് ആഗസ്റ്റ് മാസം 17ന് പള്ളി ജില്ലാ ഭരണകൂടം ഏറ്റെടുത്തിരുന്നു. തുടര്ന്നാണ് ഇപ്പോള് പള്ളിയുടെ താക്കോല് ഓര്ത്തഡോക്സ് സഭയ്ക്ക് കൈമാറാന് ഹൈക്കോടതി ഉത്തരവിട്ടിരിക്കുന്നത്.
വിധി നടപ്പാക്കുന്നതിനെതിരെ യാക്കോബായ സഭ വലിയ പ്രതിഷേധം സംഘടിപ്പിച്ചിരുന്നു. തങ്ങള് പരമ്പരാഗതമായി ആരാധന നടത്തിയിരുന്ന ദേവാലയമാണിതെന്ന നിലപാടായിരുന്നു യാക്കോബായ സഭ സ്വീകരിച്ചിരുന്നത്. പള്ളി ഓര്ത്തഡോക്സ് സഭയ്ക്ക് വിട്ടുനല്കരുതെന്നും തുടര്ന്നും തങ്ങള്ക്ക് ആരാധന അനുവദിക്കണമെന്നും ആവശ്യപ്പെട്ട് യാക്കോബായ സഭ നല്കിയ ഹര്ജി സുപ്രീംകോടതി തള്ളിയിരുന്നു. ജസ്റ്റിസ് അശോക് ഭൂഷണ് ഉള്പ്പെട്ട ബെഞ്ചാണ് ഹൈക്കോടതി വിധി ശരിവെച്ച് യാക്കോബായ സഭയുടെ ആവശ്യം തള്ളിയത്.
മുളന്തുരുത്തി പള്ളി പൂട്ടി താക്കോല് എറണാകുളം ജില്ലാ കളക്ടര് സൂക്ഷിക്കാന് ഹൈക്കോടതി നിര്ദ്ദേശിച്ചിരുന്നു. പള്ളി കളക്ടര് ഏറ്റെടുത്ത് ഓര്ത്തഡോക്സ് വിഭാഗത്തിന് കൈമാറണമെന്ന ഹൈക്കോടതി സിംഗിള് ബെഞ്ച് നിര്ദ്ദേശം നടപ്പാക്കാത്തതിനെതിരായ കോടതിയലക്ഷ്യ ഹര്ജിയുമായി ബന്ധപ്പെട്ട് സര്ക്കാര് നല്കിയ അപ്പീലിലാണ് ജസ്റ്റിസ് എ.എം. ഷഫീഖ്, ജസ്റ്റിസ് പി. ഗോപിനാഥ് എന്നിവരടങ്ങുന്ന ഡിവിഷന് ബെഞ്ച് ഉത്തരവ്. ഇത് അനുസരിച്ച് ആഗസ്റ്റ് 17ന് പള്ളി പൂട്ടി താക്കോല് കളക്ടര് സൂക്ഷിക്കുകയാണ്.
