ഇടുക്കി: മഴ ശമിച്ചെങ്കിലും മുല്ലപ്പെരിയാര് അണക്കെട്ടില് ജലനിരപ്പ് ഉയരുന്നു. 140.65 അടിയാണ് നിലവിലെ ജലനിരപ്പ്. 2,300 ഘനയടി വെള്ളമാണ് ഡാമില് നിന്ന് തമിഴ്നാട് കൊണ്ടുപോകുന്നത്. നീരൊഴുക്കും തമിഴ്നാട് കൊണ്ടുപോകുന്ന വെള്ളത്തിന്റെ അളവും ഒന്നാണ്. സുപ്രിംകോടതി നിജപ്പെടുത്തിയിട്ടുള്ള ഡാമിന്റെ പരമാവധി സംഭരണ ശേഷി 141 അടിയാണ്. ജലനിരപ്പ് 141 അടി പിന്നിട്ടാല് സ്പില്വേ ഷട്ടറുകള് തമിഴ്നാട് തുറക്കും. ഇന്നലെ ഡാമിലെ ജലനിരപ്പില് വലിയ മാറ്റം ഉണ്ടായിരുന്നില്ല. എന്നാല് വൈകിട്ടോടെ ഡാമിന്റെ വൃഷ്ടിപ്രദേശത്ത് ശക്തമായ മഴ പെയ്തതാണ് ജലനിരപ്പ് ഉയരാന് കാരണം. നിലവില് ഡാമിന്റെ വൃഷ്ടിപ്രദേശത്ത് മഴയ്ക്ക് ശമനമുണ്ട്.
