കൊച്ചി : കലൂര് സ്റ്റേഡിയത്തിന് മുന്നില് സംഗീതനിശയ്ക്കിടെ യുവാവിനെ കുത്തിക്കൊന്ന സംഭവത്തില് ഒരാള് പിടിയിലായി. കേസിലെ മുഖ്യപ്രതികളെ രക്ഷപ്പെടാന് സഹായിച്ച എറണാകുളം സ്വദേശി അഭിലാഷിനെയാണ് പോലീസ് കസ്റ്റഡിയിലായത്. കേസിലെ മുഖ്യപ്രതികളായ കാസര്കോട് സ്വദേശിയെയും തിരുവനന്തപുരം സ്വദേശിയെയും പോലീസിന് പിടികൂടാനായിട്ടില്ല.
ശനിയാഴ്ച അര്ധരാത്രിയോടെയാണ് കൊച്ചി പനയപ്പിള്ളി സ്വദേശി എം.ആര്. രാജേഷി(27)നെ കലൂര് സ്റ്റേഡിയത്തിന് മുന്നിലിട്ട് കുത്തിക്കൊലപ്പെടുത്തിയത്. അന്നേദിവസം രാത്രി കലൂരില് ലേസര് സംഗീതനിശ നടത്തിയ ഇവന്റ് മാനേജ്മെന്റ് കമ്പനിയിലെ ജീവനക്കാരനായിരുന്നു രാജേഷ്. സംഗീത പരിപാടിയ്ക്കിടെ പെണ്കുട്ടികളോട് മോശമായി പെരുമാറിയതിനെ തുടര്ന്ന് ചിലരെ സംഘാടകര് പുറത്താക്കിയിരുന്നു. ഇവരാണ് പിന്നീട് തിരിച്ചെത്തി തര്ക്കമുണ്ടാക്കുകയും യുവാവിനെ കൊലപ്പെടുത്തിയതെന്നുമാണ് പോലീസിന്റെ വിശദീകരണം.
