തിരുവനന്തപുരം: നെടുമങ്ങാട്ടെ ഒന്നര വയസുകാരന്റെ കൊലപാതകത്തില് പ്രതി അഷ്കറിന്റെ വാഹനം അടിച്ച് തകര്ത്ത് അജ്ഞാത സംഘം. ഇന്ന് പുലര്ച്ചെയാണ് സംഭവം. പനവൂരിലെ വാടക വീടിന് മുന്നിലെ റോഡില് പാര്ക്ക് ചെയ്തിരുന്ന വാഹനമാണ് അടിച്ച് തകര്ത്ത നിലയില് കാണപ്പെട്ടത്. ബൈക്കില് എത്തിയ രണ്ടംഗ സംഘമാണ് ആക്രമണം നടത്തിയതെന്ന് നാട്ടുകാര് പറഞ്ഞു. കുഞ്ഞിന്റെ കൊലപാതകത്തില് അഷ്കര് കുറ്റം സമ്മതിച്ചിരുന്നു. സംഭവ ദിവസം ചോറ് നല്കുന്നതിനിടെ കുഞ്ഞ് കരഞ്ഞെന്നും കരച്ചില് നിര്ത്താത്തതിനെ തുടര്ന്ന് തലയില് ശക്തമായി അടിച്ചെന്നുമാണ് ഇയാള് പോലീസിനോട് പറഞ്ഞത്. അടിയേറ്റ കുഞ്ഞിന്റെ ബോധം നഷ്ടമായെന്നും ഇയാള് പോലീസിനോട് പറഞ്ഞിരുന്നു.
പ്രതിയുടെ മൊഴിയുടെയും കുഞ്ഞിന്റെ ശരീരത്തിലേറ്റ മുറിവുകളുടെയും അടിസ്ഥാനത്തില് ദീര്ഘനാളായി ഇയാള് കുഞ്ഞിനെ മര്ദ്ദിച്ചിരുന്നുവെന്നാണ് പോലീസിന്റെ വിലയിരുത്തല്. കുഞ്ഞിന്റെ കൈകള് ഒടിഞ്ഞത് പ്രതിയുടെ ആക്രമണത്തില് ആണോ എന്ന് പോലീസ് പരിശോധിച്ചുവരികയാണ്. കൊലപാതകത്തില് അമ്മ അഖിലയുടെ പങ്കും പോലീസ് അന്വേഷിക്കുന്നുണ്ട്. കുഞ്ഞ് അര്ഷിദ് നേരിട്ടത് കൊടും പീഡനമാണെന്ന് വ്യക്തമാക്കുന്ന പോസ്റ്റ്മോര്ട്ടം റിപ്പോര്ട്ട് പുറത്തുവന്നിരുന്നു.
