ബെംഗളൂരു : കേരളത്തിന് മൂന്ന് പുതിയ ട്രെയിനുകള് അനുവദിച്ചു. തിരുപ്പതി-കൊല്ലം, എറണാകുളം- വേളാങ്കണ്ണി, മംഗളൂരു – രാമേശ്വരം ട്രെയിനുകളാണ് സംസ്ഥാനത്തിന് ലഭിക്കുക. ബെംഗളൂരുവില് നടന്ന ഓള് ഇന്ത്യ റെയില്വെ ടൈംടേബിള് യോഗത്തിലാണ് ഇത് സംബന്ധിച്ച ധാരണയുണ്ടായത്.
റെയില്വേ ബോര്ഡ് അന്തിമ വിജ്ഞാപനം പുറത്തിറത്തിറക്കുന്നതോടെ ഈ മൂന്ന് ട്രെയിനുകള്ക്കും സര്വീസ് ആരംഭിക്കാനാകും.
എറണാകുളം – വേളാങ്കണ്ണി അവധിക്കാല സ്പെഷ്യല് സര്വീസായി ഇപ്പോഴുണ്ട്. റെയില്വേ ബോര്ഡ് അംഗീകാരം നല്കിയാല് സ്പെഷ്യലിന് പകരം ആഴ്ചയില് രണ്ട് ദിവസം നിരക്ക് കുറവുള്ള സാധാരണ സര്വീസാക്കി മാറ്റാന് കഴിയും. തിരുപ്പതി-കൊല്ലം ട്രെയിനും ആഴ്ചയില് രണ്ട് ദിവസമായിരിക്കും. തിരുവനന്തപുരം-മധുര അമൃത എക്സ്പ്രസ് രാമേശ്വരത്തേക്കും പാലക്കാട്-തിരുനെല്വേലി പാലരുവി എക്സ്പ്രസ് തൂത്തുക്കുടിയിലേക്കും ഗുരുവായൂര്-പുനലൂര് എക്സ്പ്രസ് മധുരയിലേക്കും ബെംഗളൂരു-കണ്ണൂര് എക്സ്പ്രസ് കോഴിക്കോട്ടേക്കും നീട്ടാനുള്ള ശുപാര്ശകളും അംഗീകരിച്ചിട്ടുണ്ട്. പൂണെ എക്സ്പ്രസ് കോട്ടയം വരെ നീട്ടുന്നത് അംഗീകരിച്ചെങ്കിലും അടുത്ത വര്ഷമേ ഉണ്ടാകൂ.
വന്ദേ ഭാരത് കോച്ചുകളുടെ നിര്മാണത്തിന് മുന്ഗണന നല്കുന്നതിനാല് സാധാരണ കോച്ചുകളുടെ നിര്മാണത്തില് കുറവായിട്ടുണ്ട്. പുതിയ ട്രെയിനുകള് അനുവദിക്കുമ്പോള് നേരിടുന്ന പ്രധാന പ്രശ്നം കോച്ച് ലഭ്യതയായിരിക്കും. വരുന്ന ടൈംടേബിളില് നേത്രാവതി എക്സ്പ്രസിന്റെ സമയം മാറും. ഭുവനേശ്വര്-ചെന്നൈ ട്രെയിന് എറണാകുളത്തേക്ക് നീട്ടാനുള്ള ശുപാര്ശ റെയില്വെ അംഗീകരിച്ചില്ല.