ഇടുക്കി : കട്ടപ്പന വെള്ളയാംകുടിയിൽ ബൈക്ക് ട്രാന്സ്ഫോർമറിന്റെ സുരക്ഷാവേലിക്കുള്ളിൽ കുടുങ്ങിയ സംഭവത്തിൽ ബൈക്ക് ഓടിച്ചയാളുടേതടക്കം മൂന്ന് പേരുടെ ലൈസൻസ് സസ്പെൻഡ് ചെയ്തു. മത്സര ഓട്ടത്തിനിടെയാണ് അമിത വേഗതയിലെത്തിയ ബൈക്ക് നിയന്ത്രണം വിട്ട് കുതിച്ചുപൊങ്ങി ട്രാന്സ്ഫോർമറിന്റെ വേലിക്കെട്ടിനുള്ളിൽ കുടുങ്ങിയത്. ഇതിന്റെ വീഡിയോ സമൂഹമാധ്യമങ്ങളിൽ വൈറലായിരുന്നു.
ബൈക്ക് ഓടിച്ച കട്ടപ്പന വലിയകണ്ടം സ്വദേശി വിഷ്ണു പ്രസാദ്, ഒപ്പമുണ്ടായിരുന്ന കിഴക്കേമാട്ടുക്കട്ട സ്വദേശി ആദിത്യ ഷിജു, അയ്യപ്പൻകോവിൽ സ്വദേശി നിഥിന് ബിജു എന്നിവരുടെ ലൈസൻസാണ് സസ്പെന്ഡ് ചെയ്തത്. അപകടം ഉണ്ടാക്കിയ ബൈക്ക് ഓടിച്ച വിഷ്ണുവിന്റെ ലൈസൻസ് ആറുമാസത്തേക്കും മറ്റ് രണ്ട് പേരുടെയും ലൈസൻസ് മൂന്ന് മാസത്തേക്കുമാണ് സസ്പെന്ഡ് ചെയ്തത്.
