റാന്നി: സ്വാതന്ത്ര്യത്തിന്റെ എഴുപത്തിയഞ്ചാം വാര്ഷികത്തിന്റെ ഭാഗമായി നാറാണംമൂഴി ഗവൺമെൻറ് എല്.പി സ്കൂള് ത്രിവര്ണ്ണശോഭയില് അണിഞ്ഞൊരുങ്ങി.ആസാദി കാ അമൃത് മഹോത്സവത്തിന്റെ ഭാഗമായിട്ടാണ് സ്കൂള് ചായംപൂശി മനോഹരമാക്കിയത്. സ്വാതന്ത്ര്യ ദിനം വ്യത്യസ്തമാക്കണമെന്ന ആലോചനയില് നിന്നുമാണ് സ്കൂള് അധികൃതര് ഇത്തരം ഒരാശയത്തിലേക്ക് തിരിഞ്ഞത്. അധ്യാപകരുടേയും പിടിഎയുടേയും ശ്രമഫലമായാണ് സ്കൂള് മുഖംമിനുക്കിയത്. സ്കൂളിനോടു ചേര്ന്നുള്ള അങ്കണവാടിയും ഇതിനൊപ്പം നിറംമാറിയിട്ടുണ്ട്. സ്വാതന്ത്ര്യ ദിനമായ നാളെ രാവിലെ സ്കൂള് അങ്കണത്തില് നാറാണംമൂഴി ഗ്രാമ പഞ്ചായത്ത് പ്രസിഡന്റ് ബീനാ ജോബി പതാക ഉയര്ത്തും. സ്കൂളില് നിന്നും പഞ്ചായത്ത് ഓഫീസിലേക്ക് സ്വാതന്ത്ര്യ സന്ദേശ റാലിയും നടത്തും.
