മുംബൈ: ബോളിവുഡ് നടന് ഷാരൂഖ് ഖാന്റെ മകന് ആര്യന് ഖാന്റെ മയക്കുമരുന്ന് കേസില് ഉള്പ്പെട്ട മുംബൈയിലെ നാര്ക്കോട്ടിക് കണ്ട്രോള് ബ്യൂറോയിലെ (എന്സിബി) മുതിര്ന്ന ഉദ്യോഗസ്ഥന് വിശ്വ വിജയ് സിംഗിനെ സര്വീസില് നിന്ന് പിരിച്ചുവിട്ടു. മറ്റൊരു കേസുമായി ബന്ധപ്പെട്ട് മോശമായി പെരുമാറിയതിന്റെ പേരിലാണ് ഉദ്യോഗസ്ഥനെ പുറത്താക്കിയത്. 2021ല് മുംബൈയില് കോര്ഡെലിയ ക്രൂസ് റെയ്ഡ് ചെയ്യുകയും ആര്യന് ഖാനെ അറസ്റ്റ് ചെയ്യുകയും ചെയ്ത എന്സിബി ഉദ്യോഗസ്ഥരില് ഒരാളാണ് സിംഗ്.
എന്സിബിയുടെ മുംബൈ ഓഫീസിലെ സൂപ്രണ്ടായിരുന്നു വിശ്വ വിജയ് സിംഗ്. ആര്യന് ഖാനെതിരായ കേസ് അന്വേഷിച്ചിരുന്ന ഉദ്യോഗസ്ഥനും വിശ്വ വിജയ് സിംഗ് ആയിരുന്നു. ആര്യന് ഖാന് ക്ലീന് ചിറ്റ് ലഭിച്ചതിന് പിന്നാലെ എന്സിബി ഇയാളെ സസ്പെന്ഡ് ചെയ്തിരുന്നു. അന്വേഷണത്തിന് പിന്നിലെ അഴിമതി ആരോപണങ്ങള് അടക്കമുള്ളവ അന്വേഷിക്കാന് മറ്റൊരു ഉദ്യോഗസ്ഥനെ ചുമതലപ്പെടുത്തുകയും ചെയ്തിരുന്നു. സസ്പെന്ഷനില് തന്നെ തുടരുകയായിരുന്ന വിശ്വ വിജയ് സിംഗിനെതിരെ 2019 മുതല് അന്വേഷണം നടന്നിരുന്നു. ഇതിന്റെ റിപ്പോര്ട്ട് പുറത്ത് വന്നതിന് പിന്നാലെയാണ് ഇയാളെ സര്വ്വീസില് നിന്ന് നീക്കിയത്. മുതിര്ന്ന ഉദ്യോഗസ്ഥരുടെ അനുമതിയില്ലാതെ സിംഗപ്പൂരിലേക്ക് പോയ മറ്റൊരു ഇന്റലിജന്സ് ഉദ്യോഗസ്ഥനായ വിശ്വനാഥ് തിവാരിയെയും സസ്പെന്ഡ് ചെയ്തിട്ടുണ്ട്.
