കണ്ണൂര് : ജില്ലയിലെ ദേശീയപാതാ വികസനവുമായി ബന്ധപ്പെട്ട് പ്രാദേശിക തലത്തില് ഉയരുന്ന പ്രായോഗിക പ്രശ്നങ്ങള് പരിഹരിക്കാന് ദേശീയപാത അതോറിറ്റി (എന് എച്ച് എ ഐ) തയ്യാറാകണമെന്ന് ജില്ലയിലെ എംഎല്എമാര് ആവശ്യപ്പെട്ടു. എന് എച്ച്-66 വികസനം സംബന്ധിച്ച് ജില്ലാ കലക്ടര് എസ് ചന്ദ്രശേഖറിന്റെ അധ്യക്ഷതയില് ചേര്ന്ന അവലോകന യോഗത്തിലാണ് എം എല് എ മാര് ഇക്കാര്യം ഉന്നയിച്ചത്. കലക്ടറുടെ ചേംബറിലും തല്സമയം ഓണ്ലൈനിലുമായാണ് യോഗം ചേര്ന്നത്. ഹൈവെ വികസനത്തിന്റെ ഭാഗമായി പാപ്പിനിശ്ശേരി സി എച്ച് സി-പാറക്കല് റോഡില് ബോക്സ് കള്വെര്ട്ട് സ്ഥാപിക്കണമെന്ന് കെ വി സുമേഷ് എം എല് എ ആവശ്യപ്പെട്ടു.
പയ്യന്നൂര് മേഖലയിലെ പ്രമുഖ ജലസ്രോതസ്സായ വെള്ളൂര് രാമന്കുളം പൂര്ണമായും സംരക്ഷിക്കാന് ആവശ്യമായ നടപടികള് ദേശീയപാത അതോറിറ്റി സ്വീകരിക്കണമെന്ന് ടി ഐ മധുസൂദനന് എം എല് എ പറഞ്ഞു. മണക്കാട് കരിവെള്ളൂര് കോറോം റോഡില് ചെറുവാഹനങ്ങള്ക്കുള്ള അടിപ്പാതയും പയ്യന്നൂര് മണിയറ റോഡില് അടിപ്പാതയും നിര്മ്മിക്കണമെന്നും അദ്ദേഹം ആവശ്യപ്പെട്ടു. ദേശീയ പാതാ വികസനവുമായി ബന്ധപ്പെട്ടുയര്ന്ന ഗൗരവകരമായ പ്രശ്നങ്ങള് പരിഗണിക്കാമെന്ന് എന് എച്ച് എ ഐ അധിക്യതര് ഉറപ്പ് നല്കി. എം എല് എ മാരായ കെ പി മോഹനന്, സജീവ് ജോസഫ് എന്നിവര് ചേംബറിലും രാമചന്ദ്രന് കടന്നപ്പള്ളി, എം വിജിന് എന്നിവര് ഓണ്ലൈനായും സംബന്ധിച്ചു. ദേശീയ പാത വികസനവുമായി ബന്ധപ്പെട്ട വിവിധ ഉദ്യോഗസ്ഥരും യോഗത്തില് പങ്കെടുത്തു.