തിരുവനന്തപുരം : മെഡിക്കൽ കോളേജിന് സമീപത്തെ ബാറിൽ ദേശീയ കബഡി താരത്തിന് നേരെ ഗുണ്ടാസംഘത്തിന്റെ ക്രൂരമായ ആക്രമണം. ദേശീയ താരം അമൽജിത്തിനാണ് (24) കുത്തേറ്റത്. അക്രമത്തിനിടെയുണ്ടായ മൽപിടുത്തത്തിൽ നിലത്തുവീണ അമൽജിത്തിന്റെ നട്ടെല്ലിന് ഗുരുതരമായി പൊട്ടലേറ്റു. കഴിഞ്ഞ ബുധനാഴ്ച രാത്രി 11 മണിയോടെ മെഡിക്കൽ കോളേജിന് സമീപത്തെ ബാറിന്റെ റൂഫ് ടോപ്പിലായിരുന്നു സംഭവം. യാതൊരുവിധ പ്രകോപനവുമില്ലാതെയാണ് സംഘം തന്നെ ആക്രമിച്ചതെന്ന് അമൽജിത്ത് പോലീസിന് മൊഴി നൽകി. സുഹൃത്തുക്കൾക്കൊപ്പം ബാറിലെത്തിയ അമൽജിത്തിനെ അക്രമിസംഘം കുത്തുകയായിരുന്നു. പരിക്കേറ്റ് വീണ താരത്തെ ഉടൻതന്നെ ആശുപത്രിയിൽ പ്രവേശിപ്പിച്ചു. നട്ടെല്ലിനേറ്റ പരിക്ക് ഗുരുതരമായതിനാൽ വിദഗ്ധ ചികിത്സ തുടരുകയാണ്.
മെഡിക്കൽ കോളേജ് പൊലീസ് സംഭവസ്ഥലത്തെത്തി പ്രാഥമിക തെളിവുകൾ ശേഖരിച്ചു. ബാറിലെ സിസിടിവി ദൃശ്യങ്ങൾ വിശദമായി പരിശോധിച്ചതിൽ നിന്നും പ്രതികളെക്കുറിച്ച് വ്യക്തമായ സൂചന ലഭിച്ചിട്ടുണ്ട്. അക്രമികളെ പോലീസ് തിരിച്ചറിഞ്ഞതായും ഒളിവിൽ പോയ പ്രതികൾക്കായി തിരച്ചിൽ ഊർജിതമാക്കിയതായും മെഡിക്കൽ കോളേജ് എസ്.എച്ച്.ഒ അറിയിച്ചു. സംഭവത്തിന് പിന്നിൽ ലഹരിസംഘങ്ങളാണോ എന്ന് പോലീസ് അന്വേഷിച്ചുവരികയാണ്.
