പത്തനംതിട്ട : കോവിഡ് കാലത്ത് വായ്പകൾക്ക് ഏർപ്പെടുത്തിയ മോറട്ടോറിയം കാലാവധി നീട്ടണമെന്നും പലിശ ഒഴിവാക്കണമെന്നും എൻ.സി.പി സംസ്ഥാന ജനറൽ സെക്രട്ടറി മാത്യൂസ് ജോർജ്ജ് ആവശ്യപ്പെട്ടു. ആവശ്യമെങ്കിൽ പലിശ സബ്സിഡി അനുവദിക്കുവാൻ സംസ്ഥാന ഗവണ്മെന്റ് തയ്യാറാകണം. വായ്പ മോറട്ടോറിയം സംബന്ധിച്ചു കേസ് സുപ്രിം കോടതി പരിഗണിക്കാനിരിക്കെ കേസിൽ സംസ്ഥാന ഗവണ്മെന്റ് കക്ഷി ചേരണമെന്നും എൻ.സി.പി ആവശ്യപ്പെട്ടു.
സംസ്ഥാന വ്യാപകമായി നടത്തിയ ധർണ്ണയുടെ ഭാഗമായി പത്തനംതിട്ട ഹെഡ് പോസ്റ്റോഫീസിനു മുൻപിൽ നടത്തിയ സമരം എൻ.സി.പി സംസ്ഥാന ജനറൽ സെക്രട്ടറി മാത്യൂസ് ജോർജ്ജ് ഉൽഘാടനം ചെയ്തു. ബ്ലോക്ക് പ്രസിഡന്റ് ചിഞ്ചു ജേക്കബ് അധ്യക്ഷത വഹിച്ചു. റിജിൻ കരമുണ്ടക്കൽ, വർക്കി മുല്ലശ്ശേരി, ബ്ലോക്ക് പഞ്ചായത്ത് അംഗം എജി ജോൺ, ബാലു മോൻ എന്നിവർ പ്രസംഗിച്ചു.
