തിരുവനന്തപുരം : ഹോട്ടലുകള്, റിസോര്ട്ടുകള്, ഹോംസ്റ്റേകള് എന്നിവിടങ്ങളില് ഡ്രൈവര്മാര്ക്ക് അടിസ്ഥാന സൗകര്യങ്ങള് ഉറപ്പു വരുത്താന് ആവശ്യമായ നടപടികള് സ്വീകരിക്കുമെന്ന് ടൂറിസം മന്ത്രി പി.എ മുഹമ്മദ് റിയാസ് പറഞ്ഞു. ഇതിലൂടെ വിനോദസഞ്ചാര മേഖലയില് കേരളം രാജ്യത്തിനാകെ മാതൃകയാകുമെന്നും അദ്ദേഹം പറഞ്ഞു. വിവിധ ടാക്സി, ഓട്ടോറിക്ഷ യൂണിയനുകളുടേയും ടൂര് ഓപ്പറേറ്റര്മാരുടെ അസോസിയേഷനുകളുടേയും യോഗത്തില് സംസാരിക്കുകയായിരുന്നു മന്ത്രി. ഹോട്ടലുകള്, റിസോര്ട്ടുകള്, ഹോം സ്റ്റേകള് എന്നിവിടങ്ങളില് വിനോദ സഞ്ചാരികളുമായി എത്തുന്ന ഡ്രൈവര്മാര്ക്ക് അടിസ്ഥാന സൗകര്യങ്ങള് ലഭ്യമാകുന്നുണ്ടെന്ന് ഉറപ്പാക്കേണ്ടതുണ്ട്. ഇക്കാര്യം ബന്ധപ്പെട്ട ടൂറിസം വ്യവസായ പ്രതിനിധികളുമായി ചര്ച്ച ചെയ്യും.
ടൂറിസത്തിന്റെ ബ്രാന്ഡ് അംബാസഡര്മാരായ ഡ്രൈവര്മാര് വിവിധ പ്രശ്നങ്ങള് നേരിടുന്നുണ്ട്. ഹോട്ടലുകള്, റിസോര്ട്ടുകള്, ഹോംസ്റ്റേകള് എന്നിവയുടെ ക്ലാസിഫിക്കേഷന് മാനദണ്ഡങ്ങളില് ഡ്രൈവര്മാര്ക്കുള്ള അടിസ്ഥാന സൗകര്യങ്ങള് ഉറപ്പുവരുത്താനുള്ള ചട്ടം ഉള്പ്പെടുത്താനുള്ള സാധ്യതയെപ്പറ്റി സര്ക്കാര് പരിശോധിക്കും. ഡ്രൈവര്മാര്ക്ക് ശുചിമുറികള് ഉള്പ്പെടെയുള്ള അടിസ്ഥാന സൗകര്യങ്ങള് ഉറപ്പാക്കുമെന്നും റിയാസ് പറഞ്ഞു. അതിഥികളുമായി വിനോദ സഞ്ചാര കേന്ദ്രങ്ങളില് എത്തുന്ന ഡ്രൈവര്മാര്ക്ക് പ്രത്യേക ഐ.ഡി കാര്ഡുകള് നല്കും. സംസ്ഥാനത്തുടനീളമുള്ള 153 സര്ക്കാര് റെസ്റ്റ് ഹൗസുകളില് കംഫര്ട്ട് സ്റ്റേഷനുകള് സ്ഥാപിക്കാന് പദ്ധതിയുണ്ടെന്നും അദ്ദേഹം പറഞ്ഞു.
