ഇടുക്കി: മാവടിയില് വീട്ടില് ഉറങ്ങിക്കിടന്ന ഗൃഹനാഥന് വെടിയേറ്റു മരിച്ച സംഭവത്തില് വന് ട്വിസ്റ്റ്. പ്രതികള് മനപൂര്വ്വം വെടിവച്ച് നെടുങ്കണ്ടം മാവടി സ്വദേശി പ്ലാക്കല് സണ്ണിയെ കൊലപ്പെടുത്തുകയായിരുന്നുവെന്നാണ് പോലീസ് നിഗമനം. മാവടി തകിടിയല് സജി (50), മുകുളേല്പ്പറമ്പില് ബിനു (40), മുനിയറ സ്വദേശി വിനീഷ് (38) എന്നിവരെ നേരത്തെ പോലീസ് അറസ്റ്റ് ചെയ്തിരുന്നു. ഇവരെ ചോദ്യം ചെയ്തതില് നിന്നാണ് നിര്ണായക വിവരം പുറത്ത് വന്നത്.
പ്രതികളില് ഒരാളായ ബിനുവിനെ മുമ്പ് ചാരായ കേസില് അറസ്റ്റു ചെയ്തിരുന്നു. ചാരായ വാറ്റ് സംബന്ധിച്ച എക്സൈസിന് വിവരം നല്കിയത് കൊല്ലപ്പെട്ട സണ്ണിയാണെന്നാണ് പ്രതികള് കരുതിയിരുന്നത്. സജിയുടെ നിര്ദ്ദേശ പ്രകാരമാണ് ബിനു ചാരായം വാറ്റിയത്. ഇതാണ് വൈരാഗ്യത്തിന് കാരണം. പിടിയിലായ സജിയാണ് വെടിവച്ചത്. ബുധനാഴ്ച രാത്രി 11.30യോടെയായിരുന്നു സംഭവം. സണ്ണി വീട്ടില് കിടന്നുറങ്ങുകയായിരുന്നു. വീടിന്റെ കതകില് വെടിയുണ്ടകള് തറച്ച പാടുകള് കണ്ടതാണ് പോലീസിന്റെ സംശയം വര്ധിപ്പിച്ചത്.
