ഡൽഹി : നീറ്റ് പരീക്ഷ ചോദ്യപേപ്പർ ക്രമക്കേടുമായി ബന്ധപ്പെട്ട് മഹാരാഷ്ട്രയിൽ ഒരാൾ കൂടി പിടിയിലായി. പൂനെ സ്വദേശിയായ ധനഞ്ജയ് ലോകണ്ടേ എന്നയാളെയാണ് അഹല്യ നഗർ പോലീസ് രഹുരിയിൽ നിന്ന് പിടികൂടിയത്. ചോദ്യപേപ്പർ ചോർച്ചയുടെ ഉത്ഭവ കേന്ദ്രം ഇയാളാണെന്ന നിഗമനത്തിലാണ് അന്വേഷണ സംഘം. കഴിഞ്ഞ ദിവസം നാസിക്കിൽ നിന്ന് പിടിയിലായ ശുഭത്തിന് ചോദ്യപേപ്പർ അയച്ചുനൽകിയത് ധനഞ്ജയ് ആണെന്ന് പോലീസ് കണ്ടെത്തിയിട്ടുണ്ട്. ചോർന്നത് യഥാർത്ഥ നീറ്റ് ചോദ്യപേപ്പർ തന്നെയാണെന്ന പ്രാഥമിക നിഗമനത്തിലേക്ക് സിബിഐ എത്തിയിട്ടുണ്ട്. ഡൽഹിയിലും മറ്റ് സ്ഥലങ്ങളിലും മാതൃകാ ചോദ്യപേപ്പറുകൾ തയ്യാറാക്കാൻ ഉപയോഗിച്ചത് ഇത്തരത്തിൽ ചോർന്ന യഥാർത്ഥ പേപ്പറാണെന്നാണ് സംശയിക്കുന്നത്.
ഇന്ന് രാവിലെ കേസ് ഏറ്റെടുത്ത സിബിഐ, പിടിയിലായ ധനഞ്ജയെ കൂടുതൽ ചോദ്യം ചെയ്യുന്നതിനായി കസ്റ്റഡിയിൽ വാങ്ങും. ഇയാൾക്ക് ഈ ചോദ്യപേപ്പർ മറ്റെവിടെ നിന്നെങ്കിലും ലഭിച്ചതാണോ എന്ന കാര്യവും സിബിഐ പരിശോധിക്കുന്നുണ്ട്. ചോർന്ന ചോദ്യപേപ്പർ ലഭിച്ച മറ്റ് വിദ്യാർത്ഥികളെയും സിബിഐ നിലവിൽ കസ്റ്റഡിയിലെടുത്ത് ചോദ്യം ചെയ്തു വരികയാണ്.
