പത്തനംതിട്ട : സ്വാതന്ത്ര്യം നേടിയതിനുശേഷം പട്ടിണിയും പരിവട്ടവുമായി നിലനിന്നിരുന്ന ഇന്ത്യാ രാജ്യത്തെ പഞ്ചവത്സര പദ്ധതി അടക്കമുള്ള വികസന പ്രവര്ത്തനത്തിലൂടെ പടുത്തുയര്ത്തി മുന്നോട്ടു നയിച്ച മഹാനായ നേതാവും ഭരണ കര്ത്താവുമായിരുന്നു പണ്ഡിറ്റ് ജവഹര്ലാല് നെഹ്റു എന്ന് ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് പറഞ്ഞു. രാഷ്ട്രശില്പി പണ്ഡിറ്റ് ജവഹര്ലാല് നെഹ്റുവിന്റെ 134-ാം ജന്മദിനത്തോടനുബന്ധിച്ച് ജില്ലാ കോണ്ഗ്രസ് കമ്മിറ്റിയുടെ നേതൃത്വത്തില് പത്തനംതിട്ട രാജീവ് ഭവനില് സംഘടിപ്പിച്ച അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ജവഹര്ലാല് നെഹ്റുവിന്റെ മതേതര നിലപാടും സോഷ്യലിസ്റ്റ് കാഴ്ചപ്പാടും രാഷ്ട്രത്തിന്റെ അടിസ്ഥാന ശിലകളായിരുന്നുവെന്നും ലോക നേതാവായി വളരുവാന് അദ്ദേഹത്തിന് സാധിച്ചു എന്നും ഡി.സി.സി പ്രസിഡന്റ് പറഞ്ഞു. ഡി.സി.സി വൈസ് പ്രസിഡന്റ് എ. സുരേഷ് കുമാര് അദ്ധ്യക്ഷത വഹിച്ചു. സംഘടനാകാര്യ ജനറല് സെക്രട്ടറി സാമുവല് കിഴക്കുപുറം, ഡി.സി.സി ഭാരവാഹികളായ സജി കൊട്ടയ്ക്കാട്, ജോണ്സണ് വിളവിനാല്, ബ്ലോക്ക് കോണ്ഗ്രസ് കമ്മിറ്റി പ്രസിഡന്റ് ജെറി മാത്യു സാം, പി.കെ. ഇക്ബാല്, അജിത്ത് മണ്ണില്, അബ്ദുള്കലാം ആസാദ്, അനില് കൊച്ചുമുഴിക്കല്, അബ്ദുള് ഷുക്കൂര്, ഷാജി കുളനട, സി.കെ. അര്ജ്ജുനന് എന്നിവര് പ്രസംഗിച്ചു.
