കൊല്ലം: കൊല്ലത്ത് വീട്ടമ്മയെ ആക്രമിച്ച അയല്വാസിയായ സ്ത്രീ റിമാന്ഡില്. വഴിത്തര്ക്കവുമായി ബന്ധപ്പെട്ടാണ് വീട്ടമ്മയെ കല്ലുകൊണ്ട് ആക്രമിച്ച് പരിക്കേല്പ്പിച്ചത്. കുന്നത്തൂര് പോരുവഴി അമ്പലത്തുംഭാഗം ശാസ്താംനട സുരേഷ് ഭവനില് സുരേഷ് കുമാറിന്റെ ഭാര്യ ഗീതാകുമാരി(44)ക്കാണ് പരിക്കേറ്റത്. സംഭവവുമായി ബന്ധപ്പെട്ട് ശാസ്താംനട കിഴക്കേടത്ത് വീട്ടില് ലളിത(52) യാണ് പോലീസ് പിടിയിലായത്. കഴിഞ്ഞ ദിവസം പകല് 11.30 ഓടെ ആയിരുന്നു സംഭവം നടന്നത്.
വഴിത്തര്ക്കത്തിനിടെ ലളിത കല്ല് കൊണ്ട് ഗീതാകുമാരിയെ ആക്രമിക്കുകയായിരുന്നു. കല്ലുകൊണ്ടുള്ള ആക്രമണത്തില് കൈയ്ക്കും തലയ്ക്കും പൊട്ടലേറ്റ ഗീതാകുമാരിയെ ശാസ്താംകോട്ട താലൂക്ക് ആശുപത്രിയില് പ്രവേശിപ്പിച്ചു. സംഭവത്തില് കേസെടുത്ത് അന്വേഷണം ആരംഭിച്ച ശൂരനാട് പോലീസ് ലളിതയെ അറസ്റ്റ് ചെയ്യുകയായിരുന്നു. ഇവര്ക്കെതിരെ വധശ്രമം ഉള്പ്പടെയുള്ള വകുപ്പുകള് ചുമത്തിയിട്ടുണ്ട്. കോടതിയില് ഹാജരാക്കിയ പ്രതിയെ 14 ദിവസത്തേക്ക് റിമാന്ഡ് ചെയ്തു.
