പൂനെ: നവജാത ശിശുവിനെ ജീവനോടെ കുഴിച്ചു മൂടാന്‍ ശ്രമം. ഒരു സാരിയില്‍ പൊതിഞ്ഞാണ് രണ്ടു പേര്‍ ബൈക്കില്‍ കുഞ്ഞിനെ ആളൊഴിഞ്ഞ സ്ഥലത്തെത്തിച്ചത്. കുഴിയെടുത്ത ശേഷം കുഞ്ഞിനെ കുഴിയില്‍ക്കിടത്തി മണ്ണിട്ട് മൂടാനുള്ള ശ്രമത്തിനിടെ ശരീരത്തില്‍ ശക്തിയില്‍
മണ്ണുപതിച്ച വേദനയില്‍ ചോരക്കുഞ്ഞ് വാവിട്ടു നിലവിളിക്കാന്‍ തുടങ്ങിയത് തൊട്ടടുത്ത വയലില്‍ പണിതുകൊണ്ടിരുന്ന കര്‍ഷകന്‍ പ്രകാശ് പാണ്ഡുരംഗ്‌ കേള്‍ക്കുകയും ഉടനടി അവിടേക്കയാള്‍ ഓടിയെത്തുകയുമായിരുന്നു.
കര്‍ഷകനെ കണ്ടയുടന്‍ ഉദ്യമം പാതിയില്‍ ഉപേക്ഷിച്ച്‌ കുറ്റവാളികള്‍ അയാളെ തള്ളിയിട്ടിട്ടു ബൈക്കില്‍ക്കയറി രക്ഷപെടുകയായിരുന്നു. കുഞ്ഞിന്റെ പകുതി ശരീരം മണ്ണില്‍ മൂടിയ നിലയിലായിരുന്നു. കരച്ചില്‍ നിര്‍ത്താതിരുന്ന കുഞ്ഞിനെ പുറത്തെടുത്ത് ആളുകളെ വിളിച്ചുകൂട്ടി പോലീസില്‍ അയാള്‍ വിവരം അറിയിക്കുകയും പോലീസ് സ്ഥലത്തെത്തി അന്വേഷണം ആരംഭിക്കുകയുമായിരുന്നു. കുഞ്ഞിപ്പോള്‍ സിവില്‍ ആശുപത്രിയിലാണ്. ആരോഗ്യനില തൃപ്തികരമെന്നാണ് ഡോക്ടര്‍മാര്‍ അറിയിച്ചത്.
പൂനെയിലെ പുരന്തറിലുള്ള അംബോഡി എന്ന സ്ഥലത്താണ് ഇന്നുരാവിലെ മനുഷ്യമനസ്സാക്ഷിയെ ഞെട്ടിച്ചു കളഞ്ഞ ഈ സംഭവം നടന്നത്. കുഞ്ഞിന്റെ മാതാപിതാക്കളെപ്പറ്റിയോ, കുഞ്ഞിനെ ജീവനോടെ കുഴിച്ചിടാന്‍ വന്നവരെപ്പറ്റിയോ ഇതുവരെ പോലീസിന് വിവരമൊന്നും ലഭിച്ചിട്ടില്ല.
