പുറമറ്റം : ഗവ.ആയുർവേദ ആശുപത്രിയുടെ പുതിയ കെട്ടിടം അഡ്വ. മാത്യു ടി.തോമസ് എംഎൽഎ ഉദ്ഘാടനം ചെയ്തു. ഗ്രാമപ്പഞ്ചായത്ത് പ്രസിഡന്റ് ജൂലി കെ.വറുഗീസ് അധ്യക്ഷത വഹിച്ചു. ഡിഎംഒ ഡോ. ജെ. മിനി റിപ്പോർട്ട് അവതരിപ്പിച്ചു. എംഎൽഎ ആസ്തിവികസന ഫണ്ടിൽനിന്ന് 38 ലക്ഷം രൂപയും ദേശീയ ആയുഷ് മിഷൻ വിഹിതം അഞ്ച് ലക്ഷവും പഞ്ചായത്ത് പദ്ധതി വിഹിതമായി രണ്ട് ലക്ഷവും ചെലവഴിച്ചാണ് കെട്ടിടം നിർമിച്ചത്. കെട്ടിടത്തിന് പരിശോധനാമുറി, ചികിത്സാമുറി, ഫാർമസി, സ്റ്റോർ റൂം, അടുക്കള, മൂന്ന് ശുചിമുറികൾ ഉൾപ്പെടെ 150 ചതുരശ്ര മീറ്റർ വിസ്തൃതിയാണുള്ളത്.
യോഗ പരിശീലിപ്പിക്കുന്നതിനുള്ള പ്രത്യേകസ്ഥലവും കെട്ടിടത്തിനുള്ളിൽ ഉണ്ട്. ജില്ലാ പഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ ജിജി മാത്യു, ഗ്രാമപ്പഞ്ചായത്ത് വികസന സ്റ്റാൻഡിങ് കമ്മിറ്റി ചെയർമാൻ കെ.ഒ. മോഹൻദാസ്, ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ റിൻസി തോമസ്, കോയിപ്രം ബ്ലോക്ക് പഞ്ചായത്തംഗം ലാലു തോമസ്, വാർഡ് മെമ്പർമാർ, പഞ്ചായത്ത് സെക്രട്ടറി ബിനോയ്, മെഡിക്കൽ ഓഫീസർ ഡോ. ഷിജി പാപ്പച്ചൻ തുടങ്ങിയവർ പ്രസംഗിച്ചു.
