ന്യൂഡല്ഹി: യു.കെയില് ജനിതകമാറ്റം സംഭവിച്ച കൊറോണ വൈറസ് പടര്ന്നുപിടിച്ചതോടെ ജാഗ്രതയില് ഇന്ത്യയും. നവംബര് 25 മുതല് ഡിസംബര് 23 വരെ യു.കെയില്നിന്ന് ഇന്ത്യയിലെത്തിയവരെ കര്ശന നിരീക്ഷണത്തിന് വിധേയമാക്കും. ഡിസംബര് 31 വരെ യു.കെയിലേക്കുള്ള വിമാനങ്ങള് റദ്ദാക്കിയിരിക്കുകയാണ്. വിവിധ സംസ്ഥാനങ്ങളിലായി ആറായിരത്തോളം പേരാണ് നിരീക്ഷണത്തിലുള്ളത്.
യു.കെയില്നിന്ന് കേരളത്തിലെത്തിയ എട്ടുപേര്ക്ക് ഇതുവരെ രോഗം സ്ഥിരീകരിച്ചിട്ടുണ്ട്. ഡിസംബര് ഒന്പതുമുതല് 23 വരെ 1609 പേരാണ് കേരളത്തിലെ വിമാനത്താവളങ്ങളിലെത്തിയത്. യു.കെയില് നിന്നെത്തിയ 2116 പേരാണ് നിലവില് കേരളത്തില് നിരീക്ഷണത്തിലുള്ളത്. ഇതില് 1609 പേരെയും ആര്.ടി.പി.സി.ആര് പരിശോധനക്ക് വിധേയമാക്കിയിരുന്നു. കൂടാതെ 14 ദിവസത്തെ നിരീക്ഷണവും നിര്ദേശിച്ചു. ഇവരെ നിരീക്ഷണ കാലയളവിന് ശേഷവും ആര്.ടി.പി.സി.ആര് പരിശോധനക്ക് വിധേയമാക്കും.
ഡല്ഹി വിമാനത്താവളത്തില് നാലു വിമാനങ്ങളിലായെത്തിയ 11 പേര്ക്ക് കോവിഡ് സ്ഥിരീകരിച്ചിരുന്നു. ഇവരെ വിദഗ്ധ പരിശോധനക്ക് വിധേയമാക്കുന്നതിന് എല്.എന്.ജെ.പി ആശുപത്രിയില് പ്രവേശിപ്പിച്ചിരിക്കുകയാണ്. യു.കെയില് നിന്നെത്തിയവര്ക്കായി പ്രത്യേക ഐസൊലേഷന് വാര്ഡുകള് ഒരുക്കാന് ആശുപത്രികള്ക്ക് ഡല്ഹി സര്ക്കാര് നിര്ദേശം നല്കിയിട്ടുണ്ട്. ലണ്ടനില് നിന്നെത്തിയ 950 യാത്രക്കാര്ക്ക് വിമാനത്താവളത്തില്വെച്ച് നടത്തിയ പരിശോധനയിലാണ് 11 പേര്ക്ക് രോഗം കണ്ടെത്തിയത്. 50 പേരെ നിരീക്ഷണത്തിലാക്കുകയും ചെയ്തു. കോവിഡ് സ്ഥിരീകരിച്ചവരുടെ സാമ്പിളുകള് നാഷനല് സെന്റര് ഫോര് ഡിസീസ് കണ്ട്രോളിലേക്ക് അയച്ചു.
2127 പേരാണ് യു.കെയില്നിന്ന് ഡിസംബര് ഒന്നുമുതല് 22 വരെ കര്ണാടകയിലെത്തിയത്. ഇതില് ആറുപേര്ക്ക് കോവിഡ് സ്ഥിരീകരിക്കുകയും ചെയ്തു. കൂടുതല് പരിശോധനക്കായി ഇവരുടെ സാമ്പിളുകള് ശേഖരിച്ചിട്ടുണ്ട്.
തെലങ്കാനയില് 1200പേരും ആന്ധ്ര പ്രദേശില് 68 പേരുമാണ് യു.കെയില് നിന്നെത്തിയവര്. തെലങ്കാനയില് ഏഴുപേര്ക്കും ആന്ധ്രയില് ഒരാള്ക്കുമാണ് കോവിഡ് സ്ഥിരീകരിച്ചത്. ഇവര് നിലവില് നിരീക്ഷണത്തിലാണ്.
