ചെന്നൈ: കോവിഡ് വൈറസിന്റെ പുതിയ വകഭേദം കണ്ടെത്തിയ സാഹചര്യത്തില് പത്തു ദിവസത്തിനിടെ ബ്രിട്ടനില്നിന്ന് ചെന്നൈയിലെത്തിയ 1,088 പേര് നിരീക്ഷണത്തിലാണെന്നും ജനങ്ങള് ഭയപ്പെടേണ്ട സാഹചര്യമില്ലെന്നും തമിഴ്നാട് ആരോഗ്യമന്ത്രി ഡോ. സി. വിജയഭാസ്കര്. കേരളം, കര്ണാടക സംസ്ഥാനാതിര്ത്തികളില് നിരീക്ഷണം ശക്തിപ്പെടുത്തുമെന്നും അദ്ദേഹം അറിയിച്ചു.
ലണ്ടനില്നിന്ന് ഡല്ഹി മാര്ഗം ചെന്നൈയിലെത്തിയ ഒരാള്ക്ക് കോവിഡ് സ്ഥിരീകരിച്ചിട്ടുണ്ടെന്നും വീട്ടില് ക്വാറന്റീനിലായിരുന്ന ഇയാളെ ചെന്നൈ കിങ്സ് ഇന്സ്റ്റിറ്റ്യൂട്ട് റിസര്ച്ച് സെന്ററില് പ്രവേശിപ്പിച്ചതായും മന്ത്രിയോടൊപ്പം ഉണ്ടായിരുന്ന ആരോഗ്യ വകുപ്പ് സെക്രട്ടറി ജെ.രാധാകൃഷ്ണന് വ്യക്തമാക്കി. ഇയാള്ക്ക് കോവിഡിെന്റ പുതിയ വകഭേദമാണോ ബാധിച്ചതെന്നറിയാന് സാമ്പിളുകള് പൂനെ നാഷനല് ഇന്സ്റ്റിറ്റ്യൂട്ട് ഓഫ് വൈറോളജിയിലേക്ക് അയച്ചിട്ടുണ്ട്. രോഗലക്ഷണങ്ങളോടെ ലണ്ടനില്നിന്നെത്തിയ 15 പേര് നിരീക്ഷണത്തിലാണ്.
വിദേശരാജ്യങ്ങളില്നിന്ന് തമിഴ്നാട്ടിലേക്ക് വരുന്നവര് യാത്ര പുറപ്പെടുന്നതിന് 96 മണിക്കൂര് മുന്പ് നിര്ബന്ധമായും ആര്.ടി. പി.സി.ആര് ടെസ്റ്റിന് വിധേയരാവണം. ടെസ്റ്റ് റിപ്പോര്ട്ട് നെഗറ്റിവാണെങ്കിലും പ്രത്യേകിച്ച് ലണ്ടനില്നിന്ന് എത്തുന്നവരെ ക്വാറന്റീനിലാക്കി കോവിഡ് പരിശോധന നടത്തുമെന്നും അദ്ദേഹം അറിയിച്ചു.
