തിരുവനന്തപുരം : സംസ്ഥാനത്ത് കൊറോണ മരണങ്ങളുടെ നിര്ണയത്തിനായി പുതിയ മാര്ഗനിര്ദേശങ്ങള് പുറപ്പെടുവിച്ചു. ആരോഗ്യ വകുപ്പ് മന്ത്രി വീണാ ജോര്ജാണ് ഇക്കാര്യം അറിയിച്ചത്. മരണപ്പെട്ടവരുടെ അടുത്ത ബന്ധുക്കള്ക്ക് ബുദ്ധിമുട്ടുണ്ടാക്കാത്ത രീതിയില് കോവിഡ് മരണ സര്ട്ടിഫിക്കറ്റ് ലഭിക്കത്തക്ക വിധമമാണ് മാര്ഗനിര്ദേശങ്ങള് തയ്യാറാക്കിയത്. അര്ഹരായ എല്ലാവര്ക്കും പ്രയോജനം ലഭ്യമാക്കുകയാണ് ലക്ഷ്യമെന്നും മന്ത്രി വ്യക്തമാക്കി.
സുപ്രീം കോടതിയുടെ നിര്ദേശ പ്രകാരം കേന്ദ്ര ആരോഗ്യ മന്ത്രാലയത്തിന്റേയും ഐസിഎംആറിന്റേയും മാര്ഗനിര്ദേശങ്ങള് അടിസ്ഥാനമാക്കിയാണ് പുതിയ മാര്ഗനിര്ദേശങ്ങളിറക്കിയത്. സംസ്ഥാനത്തെ എല്ലാ ജില്ലകളിലും കൊറോണ മരണ നിര്ണയ സമിതി (സി.ഡി.എ.സി) രൂപീകരിക്കുന്നതാണ്. അഡീഷണല് ജില്ലാ മജിസ്ട്രേറ്റ് (അഡീഷണല് ജില്ലാ കളക്ടര്), ജില്ലാ മെഡിക്കല് ഓഫീസര്, അഡീഷണല് ജില്ലാ മെഡിക്കല് ഓഫീസര്/ ജില്ലാ സര്വൈലന്സ് മെഡിക്കല് ഓഫീസര്, ജില്ലയിലെ ഒരു മെഡിക്കല് കോളേജിലെ മെഡിസിന് വിഭാഗം മേധാവി, സാംക്രമിക രോഗങ്ങളുടെ തലവന് അല്ലെങ്കില് പൊതുജനാരോഗ്യ വിദഗ്ദ്ധന് തുടങ്ങിയവര് ചേര്ന്നതാണ് ജില്ലാ മരണ നിര്ണയ സമിതി.
കൊറോണ മരണം സബന്ധിച്ചുള്ള ആവശ്യത്തിനായി ഇ-ഹെല്ത്ത് ഡെത്ത് ഇന്ഫോ വെബ്സൈറ്റ് സജ്ജീകരിച്ചിട്ടുണ്ട്. സംസ്ഥാനം പ്രഖ്യാപിക്കുന്ന കൊറോണ മൂലം മരിച്ചവരുടെ പേര് വിവരം ഈ വെബ്സൈറ്റില് ലഭ്യമാണ്. ഇതില് ഉള്പ്പെടാത്തവര് ഉണ്ടെങ്കില് അവരുടെ ബന്ധുക്കള്ക്ക് ഓണ്ലൈന് മുഖേന അപേക്ഷിക്കാവുന്നതാണ്. മാത്രമല്ല ആരോഗ്യ വകുപ്പിന്റെ ഔദ്യോഗിക കൊറോണ മരണ രേഖയില് തിരുത്തലുകള് വരുത്താനും സാധിക്കുന്നതാണ്. ഓണ്ലൈനിലൂടെ തന്നെയാണ് അപേക്ഷയിന്മേല് തീരുമാനമെടുക്കുന്നതും. ഒക്ടോബര് 10 മുതല് പുതിയ സംവിധാനം നിലവില് വരുന്നതാണ്.
