മുംബൈ അപര്യാപ്തമായ സ്ഥലസൗകര്യവും ഉയർന്ന വസ്തുവിലയും കാരണം വീർപ്പുമുട്ടുന്ന മുംബൈ നഗരത്തിന് ആശ്വാസമേകാൻ മഹാരാഷ്ട്ര സർക്കാരിന്റെ വൻകിട നഗരവികസന പദ്ധതി. ‘മുംബൈ 3.0’ (കർണാല-സായ്-ചിർനർ പ്രൊജക്റ്റ്) എന്ന പേരിൽ പുതിയൊരു ആസൂത്രിത നഗരം നിർമ്മിക്കാനാണ് സർക്കാർ ലക്ഷ്യമിടുന്നത്. റായ്ഗഡ് ജില്ലയിലെ ഉറാൻ, പൻവേൽ, പെൻ താലൂക്കുകളിലായി വ്യാപിച്ചുകിടക്കുന്ന 124 ഗ്രാമങ്ങളെ ഉൾപ്പെടുത്തിയാണ് ഈ പുതിയ നഗരം വിഭാവനം ചെയ്തിരിക്കുന്നത്. ഏകദേശം 323.44 ചതുരശ്ര കിലോമീറ്റർ വിസ്തൃതിയിലുള്ള ഈ പ്രദേശം ആസൂത്രിത നഗരമായി വികസിപ്പിക്കും. മുംബൈ മെട്രോപൊളിറ്റൻ റീജിയൻ ഡെവലപ്മെന്റ് അതോറിറ്റി(എം.എം.ആർ.ഡി.എ.)ക്കാണ് ഇതിന്റെ വികസന ചുമതല.
അടൽസേതു യാഥാർത്ഥ്യമായതോടെ മുംബൈയും റായ്ഗഡ് മേഖലയും തമ്മിലുള്ള ദൂരം ഗണ്യമായി കുറഞ്ഞത് ഈ പദ്ധതിക്ക് വലിയ കരുത്താകുന്നു. നിർദ്ദിഷ്ട നവി മുംബൈ അന്താരാഷ്ട്ര വിമാനത്താവളത്തിന് തൊട്ടടുത്താണ് ഈ നഗരം വരുന്നത് എന്നത് ഇതിന്റെ പ്രാധാന്യം വർധിപ്പിക്കുന്നു. പൻവേൽ-കർജത്ത് റെയിൽവേ ഇടനാഴി, വിരാർ-അലിബാഗ് മൾട്ടിമോഡൽ കോറിഡോർ, മുംബൈ-പുണെ എക്സ്പ്രസ് വേ എന്നിവയുമായുള്ള സാമീപ്യം മികച്ച ഗതാഗത സൗകര്യം ഉറപ്പാക്കും.
