വിഴിഞ്ഞം : വിഴിഞ്ഞത്ത് സ്‌കൂൾ വിദ്യാർത്ഥിനികളെ പ്രണയം നടിച്ച് വശീകരിച്ച് പീഡിപ്പിച്ച കേസിൽ സഹപാഠി ഉൾപ്പെടെ അഞ്ചുപേർ പിടിയിലായി. ഇതിൽ മൂന്നുപേർ പ്രായപൂർത്തിയാകാത്തവരാണ്. മുക്കോല കാഞ്ഞിരംവിള ലക്ഷംവീട്ടിൽ ടിനു (20), കോട്ടപ്പുറം തുലവിള സൂസന്ന ഹൗസിൽ ലിൻസൺ (21) എന്നിവരെയും മറ്റ് മൂന്ന് വിദ്യാർത്ഥികളെയുമാണ് വിഴിഞ്ഞം പോലീസ് അറസ്റ്റ് ചെയ്തത്. പ്രതികൾ ഓട്ടോറിക്ഷയിൽ കറങ്ങിനടന്ന് പെൺകുട്ടികളെ പ്രണയം നടിച്ച് വശീകരിച്ച് പീഡിപ്പിക്കുകയായിരുന്നു.തുടർന്ന് നഗ്ന ചിത്രങ്ങൾ ഉണ്ടെന്ന് പറഞ്ഞ് ഭീഷണിപ്പെടുത്തി വീണ്ടും പീഡിപ്പിക്കാൻ ശ്രമിച്ചു. കഴിഞ്ഞ വർഷം ഡിസംബർ മുതലാണ് സംഭവമെന്ന് പോലീസ് പറഞ്ഞു.
രണ്ടു സ്‌കൂൾ വിദ്യാർത്ഥിനികളെ രണ്ട് വീടുകളിൽ എത്തിച്ചായിരുന്നു പീഡനം.കഴിഞ്ഞ വർഷം സമീപത്ത സ്‌കൂളിൽ പഠിച്ചിരുന്ന പ്രതിയായ വിദ്യാർത്ഥിയെ ഒന്നും രണ്ടും പ്രതികളുടെ സഹായത്തോടെ ഈ അദ്ധ്യായന വർഷം ടി.സി വാങ്ങി പെൺകുട്ടികൾ പഠിക്കുന്ന സ്‌കൂളിൽ ചേർത്തിരുന്നു.തുടർന്ന് ഈ വിദ്യാർത്ഥിയെ ഉപയോഗിച്ച് നഗ്ന ഫോട്ടോകൾ ഉണ്ടെന്ന് പറഞ്ഞ് ഭീഷണിപ്പെടുത്തി വീണ്ടും പീഡിപ്പിക്കാൻ ശ്രമിക്കുകയായിരുന്നു. ഒഴിഞ്ഞു മാറിയതോടെ ഓട്ടോയിലെത്തി സ്ഥിരമായി റോഡിൽ വച്ച് ശല്യം ചെയ്തതോടെ പെൺകുട്ടികൾ പോലീസിൽ പരാതി നൽകി.തുടർന്ന് കേസെടുത്ത് നടത്തിയ അന്വേഷണത്തിലാണ് പ്രതികൾ പിടിയിലായതെന്ന് വിഴിഞ്ഞം എസ്.എച്ച്.ഒ കെ.ഹേമന്ത് കുമാർ പറഞ്ഞു.
