തിരുവനന്തപുരം: നെയ്യാർ ലയൺ സഫാരി പാർക്കിൽ പുതിയ പരിശോധന പാത നിർമിക്കാൻ വനംവകുപ്പ് പദ്ധതി. വാഹനങ്ങൾക്ക് കടന്നുപോകാനുള്ള നിലവിലുള്ള പാതയ്ക്ക് പുറമേയാണ് പാർക്ക് അതിർത്തിക്കുള്ളിൽ പുതിയ പരിശോധന പാത നിർമിക്കാനായി തീരുമാനമുണ്ടായത്. സഫാരി പാർക്കിൽ നിന്നും കടുവ ചാടിപ്പോയ സംഭവത്തിന്റെ പശ്ചാത്തലത്തിലാണ് സുരക്ഷാക്രമീകരണങ്ങൾ നെയ്യാറിൽ ശക്തമാക്കുന്നത്.
സുരക്ഷ മെച്ചപ്പെടുത്തുന്നത് സംബന്ധിച്ച് ചീഫ് വൈൽഡ് ലൈഫ് വാർഡൻ സുരേന്ദ്രകുമാർ വനംവകുപ്പ് മന്ത്രി കെ രാജുവിന് റിപ്പോർട്ട് നൽകിയിരുന്നു.
നിലവിലുള്ള 6 കൂടുകൾ പുതുക്കിപ്പണിയാനും നടപടികൾ തുടങ്ങിയിട്ടുണ്ട്. മൃഗങ്ങളെ നിരീക്ഷിക്കുന്നതിനായുള്ള സിസി ടിവി നിരീക്ഷണം ശക്തമാക്കുക, ലൈറ്റിങ് സൗകര്യങ്ങൾക്കുള്ള സജ്ജീകരണങ്ങൾ നടത്തുക, പാർക്കിലെ മതിലിന്റെ ഉറപ്പ് പരിശോധിക്കുക തുടങ്ങിയവ നടപടികളും ഉടനുണ്ടാകുമെന്നും വനം വകുപ്പറിയിച്ചു.
