ചെന്നൈ: സ്വര്ണക്കടത്ത് കേസുമായി ബന്ധപ്പെട്ട് കോയമ്പത്തൂരിലെ ജ്വല്ലറികളില് എന്.ഐ.എ പരിശോധന നടത്തുന്നു. കോയമ്പത്തൂരിലെ പവിഴം ജ്വല്ലറി കേന്ദ്രീകരിച്ചാണ് പ്രധാനമായും തിരച്ചില് നടത്തുന്നത്. കോയമ്പത്തൂരിലെ സ്വര്ണവ്യാപാരിയായ പവിഴം വീഥിയില് നന്ദകുമാറിനെ എന്.ഐ.എ കസ്റ്റഡിയിലെടുത്തിട്ടുണ്ട്.
തിരുവനന്തപുരം വിമാനത്താവളം വഴി കടത്തിയ സ്വര്ണം നന്ദകുമാറിലേക്കെത്തിയെന്നാണ് എന്.ഐ.എ സംശയിക്കുന്നത്. നന്ദകുമാറിന്റെ വീട്ടില് രാവിലെ നാലംഗസംഘം പരിശോധന നടത്തിയിരുന്നു. റെയ്ഡിന് ശേഷം നന്ദകുമാറിനെ കൂടുതലായി ചോദ്യം ചെയ്യാനായി കോയമ്പത്തൂര് റേസ് കോഴ്സിലുള്ള എന്.ഐ.എയുടെ ഓഫീസിലേക്ക് കൊണ്ടുപോയി.
നന്ദകുമാര് വളരെ പെട്ടെന്നാണ് കോടീശ്വരനായതെന്നാണ് സമീപവാസികളുടെ മൊഴി. ഇത് സ്വര്ണക്കടത്തിലൂടെ ആണോയെന്നാണ് എന്.ഐ.എ സംശയിക്കുന്നത്. ഏതാനം ആഴ്ചകള് മുമ്പ് തിരുച്ചിറപ്പള്ളിയിലെ ജ്വല്ലറികള് കേന്ദ്രീകരിച്ച് എന്.ഐ.എ അന്വേഷണം നടത്തുകയും മൂന്ന് പേരെ അറസ്റ്റ് ചെയ്യുകയും ചെയ്തിരുന്നു. ഇതിന്റെ തുടര്ച്ചയായാണ് ഇന്നത്തെയും റെയ്ഡ്. എന്.ഐ.എയുടെ കൊച്ചി, ചെന്നൈ ഓഫീസിലെ ഉദ്യോഗസ്ഥരാണ് റെയ്ഡിന് നേതൃത്വം നല്കുന്നത്.
