ന്യൂഡല്ഹി : പ്രതിദിന കോവിഡ് കേസുകള് ഉയരുന്നതിനൊടൊപ്പം ഒമിക്രോണ് വ്യാപനവും പരിഗണിച്ച് ഡല്ഹിയിലും രാത്രി കര്ഫ്യൂ പ്രഖ്യാപിച്ചു. രാത്രി 11 മുതല് പുലര്ച്ചെ 5 വരെയാണ് നിയന്ത്രണം. തിങ്കളാഴ്ച മുതല് പ്രാബല്യത്തില് വരും. ഡല്ഹിയില് ഞായറാഴ്ച 290 പുതിയ കോവിഡ് കേസുകള് റിപ്പോര്ട്ട് ചെയ്തു. ജൂണ് 10നു ശേഷമുള്ള ഏറ്റവും ഉയര്ന്ന നിരക്കാണിത്. 24 മണിക്കൂറിനിടെ ഒരു കോവിഡ് മരണവും റിപ്പോര്ട്ടു ചെയ്തു.
പോസിറ്റിവിറ്റി നിരക്ക് 0.55 ശതമാനമായി ഉയര്ന്നു. ജൂണ് 10ന് 305 കോവിഡ് കേസുകളും 44 മരണവുമാണ് റിപ്പോര്ട്ട് ചെയ്തത്. ഡല്ഹിയില് ആകെ കോവിഡ് കേസുകള് 14,43,352 ആയി. മരണം 25,105. നിലവില് 1103 രോഗികള് ചികിത്സയിലുണ്ട്. അതില് 583 രോഗികള് ഹോം ഐസലേഷനിലാണ്. 79 ഒമിക്രോണ് കേസുകളാണ് രാജ്യതലസ്ഥാനത്ത് ഇതുവരെ റിപ്പോര്ട്ട് ചെയ്തിരിക്കുന്നത്.
