ന്യൂഡല്ഹി : യെമനില് വധശിക്ഷയ്ക്ക് വിധിക്കപ്പെട്ട നിമിഷപ്രിയയെ രക്ഷിക്കാന് ഇടപെടണമെന്ന് ആവശ്യപ്പെട്ട് സമര്പ്പിച്ച ഹര്ജിയില് ഡല്ഹി ഹൈക്കോടതി കേന്ദ്രത്തിന് നോട്ടീസ് അയച്ചു. കേന്ദ്രം നിലപാട് വ്യക്തമാക്കണമെന്ന് ആവശ്യപ്പെട്ടാണ് നോട്ടീസ് അയച്ചത്. വധശിക്ഷ ഒഴിവാക്കാനുള്ള നീക്കത്തെ കേന്ദ്രം വാക്കാല് പിന്തുണച്ചു. ഔദ്യോഗികമായ നിലപാട് ചൊവ്വാഴ്ച അറിയിക്കാമെന്നും കേന്ദ്രം കോടതിയെ അറിയിച്ചു.
യെമന് പൗരനെ കൊലപ്പെടുത്തിയ കേസില് നിമിഷ പ്രിയയുടെ ജീവന് രക്ഷിക്കാന് കേന്ദ്രം ഇടപെടണമെന്നാവശ്യപ്പെട്ട് സേവ് നിമിഷ പ്രിയ ഇന്റര്നാഷണല് ആക്ഷന് കൗണ്സിലാണ് ഡല്ഹി ഹൈക്കോടതിയില് ഹര്ജി സമര്പ്പിച്ചത്. നയതന്ത്രതലത്തില് ഇടപെടാന് കേന്ദ്രത്തോട് നിര്ദേശിക്കണമെന്ന് ആവശ്യപ്പെട്ടാണ് ഹര്ജി. കഴിഞ്ഞ തിങ്കളാഴ്ചയാണ് യെമന് പൗരന് തലാല് അബ്ദുമഹ്ദിയെ കൊലപ്പെടുത്തിയ കേസില് പാലക്കാട് കൊല്ലങ്കോട് സ്വദേശിയായ നിമിഷ പ്രിയയുടെ വധശിക്ഷ ശരിവെച്ചത്.
