കോഴിക്കോട്: സംസ്ഥാനത്തെ നിപ ബാധയില് ആശ്വാസമെന്ന് ആരോഗ്യമന്ത്രി വീണ ജോര്ജ്ജ്. പുതിയ കേസുകള് ഒന്നും റിപ്പോര്ട്ട് ചെയ്തിട്ടില്ല. അതുപോലെ ഗുരുതരാവസ്ഥയില് തുടര്ന്നിരുന്ന 9 വയസ്സുകാരന്റെ വെന്റിലേറ്റര് സപ്പോര്ട്ട് താത്ക്കാലികമായി മാറ്റിയതായും മന്ത്രി അറിയിച്ചു. നിലവില് ഓക്സിജന് സപ്പോര്ട്ടുണ്ട്. കഴിഞ്ഞ ദിവസം കുട്ടിയുടെ ആരോഗ്യനിലയില് പുരോഗതിയുണ്ടെന്ന് വാര്ത്ത പുറത്തുവന്നിരുന്നു. പ്രതീക്ഷ നിര്ഭരമാണ് കുട്ടിയുടെ സ്ഥിതി എന്നും ആരോഗ്യമന്ത്രി അറിയിച്ചു.
1233 പേരാണ് ഇപ്പോള് സമ്പര്ക്കപ്പട്ടികയിലുള്ളത്. 23 പേര് മെഡിക്കല് കോളേജില് അഡ്മിറ്റ് ആയിട്ടുണ്ട്. ഐ എം സി എച്ചില് 4 പേര് അഡ്മിറ്റാണ്. 36 വവ്വാലുകളുടെ സാമ്പിളുകള് പരിശോധനക്കായി ശേഖരിച്ചു അയച്ചു. 24മണിക്കൂറും ലാബുകള് പ്രവര്ത്തിക്കുന്നുണ്ടെന്നും മന്ത്രി അറിയിച്ചു. സെക്കന്ററി തലത്തിലേക്ക് പോകുന്നില്ല. ആദ്യത്തെ നിപ കേസില് നിന്നാണ് എല്ലാവര്ക്കും രോഗം ബാധിച്ചിരിക്കുന്നത്. സ്ഥിതി നിയന്ത്രണ വിധേയമാണ്. പോസറ്റീവ് ആയ വ്യക്തികള് മരുന്നിനോട് പ്രതികരിക്കുന്നതും പ്രധാനപ്പെട്ട കാര്യമാണ്. ഏറ്റവും പുതിയ മോണോ ക്ലോണോ ആന്റി ബോഡി എത്തിക്കാം എന്നാണ് ഐ സി എം ആര് അറിയിച്ചിരിക്കുന്നത്. നിപ പ്രതിരോധം പാളി എന്നൊക്കെ പറയുന്നത് ആളുകളില് ആശങ്ക ഉണ്ടാക്കുമെന്നും വീണ ജോര്ജ്ജ് ചൂണ്ടിക്കാണിച്ചു.
