സംസ്ഥാനം വീണ്ടും നിപ രോഗ ഭീതിയിലാണ്. സാധാരണ വവ്വാലുകളില് കാണുന്ന വൈറസില് നിന്ന് പകര്ന്ന് മനുഷ്യന്റെ തലച്ചോറിനെ ബാധിക്കുന്ന എന്സെഫലിറ്റീസ് രോഗമാണ് ഉണ്ടാവുക. ചിലരില് ശ്വാസകോശത്തിലാണ് നിപ വൈറസ് മൂലമുള്ള രോഗബാധ ഉണ്ടാവുക. വവ്വാലുകളുടെ പ്രജനന സമയത്ത് സമയത്ത് വവ്വാലുകളില് നിന്ന് നേരിട്ടോ വവ്വാലുകളുമായി ബന്ധമുള്ള മറ്റു ജീവികളില് നിന്നോ സാധനങ്ങളില് നിന്നോ എല്ലാം മൃഗങ്ങളിലേക്കോ മനുഷ്യരിലേക്കോ ഒക്കെ വൈറസ് എത്താം. വൈറസ് ബാധിച്ച മനുഷ്യരില് നിന്ന് മനുഷ്യരിലേക്കും രോഗബാധയുണ്ടാകാം. വവ്വാലുകള്ക്കു പുറമേ പന്നികളില് നിന്നും മനുഷ്യരിലേക്ക് നിപ വൈറസ് പകരാനുള്ള സാധ്യതയേറെയാണ്. രോഗബാധയുള്ള മനുഷ്യരില്നിന്ന് വ്യക്തി സുരക്ഷാ മാര്ഗങ്ങള് സ്വീകരിക്കാതെ അടുത്തിടപഴകുന്നതുവഴിയാണ് രോഗം പകരാന് സാധ്യതയുള്ളത്. വൈറസ് ബാധയുള്ള വവ്വാലുകളുടെ കാഷ്ഠം, ഉമിനീര്, മൂത്രം എന്നിവ കലര്ന്ന പാനീയങ്ങളും വവ്വാല് കടിച്ച പഴങ്ങളും മറ്റും കഴിക്കുന്നതിലൂടെയും രോഗം പകരാം. പനിയോടു കൂടിയുള്ള ശരീരവേദന, തലവേദന, ക്ഷീണം, ചുമ, തൊണ്ടവേദന എന്നിവയാണ് പ്രാരംഭ ലക്ഷണങ്ങള്. രോഗം മൂര്ഛിക്കുന്നത് അനുസരിച്ച് ഛര്ദി, സ്ഥലകാല ബോധമില്ലായ്മ, മാനസിക വിഭ്രാന്തി, അപസ്മാരം, ബോധക്ഷയം, ശ്വാസതടസം എന്നിവയുണ്ടാകാം. ചിലരില് കാഴ്ചമങ്ങലുമുണ്ടാകാം.
എങ്ങനെ നിപയെ പ്രതിരോധിക്കാം എന്നതാണ് പ്രധാനം. പക്ഷികളുടെയും മൃഗങ്ങളുടെയും കടിയേറ്റതും പൊട്ടിയതും പോറലുള്ളതുമായ പഴങ്ങളും പച്ചക്കറികളും കഴിക്കരുത് എന്നതു തന്നെ പ്രധാനപ്പെട്ട മുന്കരുതല്. തുറന്നതും അടച്ചുവയ്ക്കാത്തതുമായ പാത്രങ്ങളില് വച്ചിട്ടുള്ള പാനീയങ്ങളും ഭക്ഷണങ്ങളും ഒഴിവാക്കുക. കിണറുകളിലും മറ്റു ജലസ്രോതസുകളിലും വവ്വാലുകളുടെ മൂത്രം, കാഷ്ഠം എന്നിവ വീഴാനുള്ള സാധ്യത തടയുക. വളര്ത്തു മൃഗങ്ങളുടെ ശരീര സ്രവവങ്ങള്, വിസര്ജ്യ വസ്തുക്കള് എന്നിവയുടെ സമ്പര്ക്കം ഉണ്ടാകാതെ സൂക്ഷിക്കുക എന്നിവയും പ്രധാനപ്പെട്ട കാര്യങ്ങളാണ്. രോഗാണുക്കള് ശരീരത്തില് പ്രവേശിച്ചു കഴിഞ്ഞാല് നാലു മുതല് 21 ദിവസങ്ങള്ക്കുള്ളില് രോഗ ലക്ഷണങ്ങള് പ്രകടമാക്കും. നിപ വൈറസ് ബാധിച്ചു രോഗാവസ്ഥയിലേക്ക് എത്തിയാല് അതിവേഗമാണ് ആരോഗ്യം മോശമാവുക. രോഗം വന്ന് ഒന്നു രണ്ടു ദിവസത്തിനുള്ളില് തന്നെ രോഗി കോമാ അവസ്ഥയിലേക്ക് പോയേക്കാം. രോഗ ലക്ഷണങ്ങള് കണ്ടാല് ഉടനടി അടുത്തുള്ള ആശുപത്രിയില് ചികിത്സ തേടണം. നിപയ്ക്ക് ഇതുവരെ കൃത്യമായ ചികിത്സ കണ്ടെത്തിയിട്ടില്ല. പല രീതിയിലുള്ള ആന്റി വൈറല് മരുന്നുകളാണ് പ്രധാനമായും രോഗികള്ക്കു നല്കുന്നത്. റിബവൈറിനൊപ്പം കോവിഡിന് നല്കിയ ചില മരുന്നുകളും നിപ ചികിത്സയില് ഉപയോഗിക്കും.
