ദില്ലി: മണിപ്പൂര് വിഷയത്തിലുള്ള പ്രതിപക്ഷത്തിന്റെ അവിശ്വാസ പ്രമേയത്തിന് മറുപടി പറയാതെ പ്രധാനമന്ത്രി നരേന്ദ്രമോദി. ഇതോടെ മണിപ്പൂര് വിഷയത്തില് പ്രധാനമന്ത്രി പ്രതികരിക്കണമെന്നാവശ്യപ്പെട്ട് ലോക്സഭയില് പ്രതിപക്ഷ പ്രതിഷേധം ഉയര്ന്നു. കേന്ദ്ര സര്ക്കാരിനെതിരായ പ്രതിപക്ഷത്തിന്റെ അവിശ്വാസപ്രമേയത്തില് ലോക്സഭയില് മറുപടി പറഞ്ഞ മോദി മണിപ്പൂരിനെക്കുറിച്ച് പരാമര്ശിക്കാത്തതിനെത്തുടര്ന്നാണ് പ്രതിപക്ഷം സഭയില് പ്രതിഷേധമുയര്ത്തിയത്.
അവിശ്വാസം കൊണ്ടുവന്ന പ്രതിപക്ഷത്തിന് നന്ദി പറഞ്ഞാണ് മോദി സംസാരിച്ചു തുടങ്ങിയത്. ഇത് സര്ക്കാരിന്റെ പരീക്ഷണമല്ല. പ്രതിപക്ഷത്തിന്റെ പരീക്ഷണം. കഴിഞ്ഞ തെരഞ്ഞെടുപ്പില് പ്രതിപക്ഷത്തോട് ജനങ്ങള് ‘അവിശ്വാസം കാണിച്ചു’. 2024 ല് ബിജെപിക്ക് റെക്കോര്ഡ് വിജയം ഉണ്ടാകും. തയ്യാറെടുപ്പോടെ വന്നുകൂടെയെന്ന് രാഹുല് ഗാന്ധിയെ പരോക്ഷമായി മോദി പരിഹസിക്കുകയും ചെയ്തു. പ്രതിപക്ഷത്തിന് അധികാരത്തോട് ആര്ത്തിയാണ്. പാവപ്പെട്ടവരെ കുറിച്ച് ചിന്തയില്ല. പ്രതിപക്ഷത്തിന്റെ അടുപ്പക്കാര്ക്ക് പോലും അവരുടെ പ്രസംഗത്തില് സന്തോഷമില്ല. അഴിമതി പാര്ട്ടികള് ഒന്നായിരിക്കുന്നുവെന്നും മോദി വിമര്ശിച്ചു. കേരളത്തിലെ എംപിമാര് ഫിഷറീസ് ബില്ലിനെ പോലും പരിഗണിച്ചില്ലെന്നാണ് മോദിയുടെ വിമര്ശനം. അധിര് രഞ്ജന് ചൗധരി നല്ല അവസരം പാഴാക്കിയെന്നും മോദി പറഞ്ഞു.
