കൊച്ചി: ഫോര്ട്ട് കൊച്ചിയിലെ നമ്പര് 18 ഹോട്ടലിലെ പോക്സോ കേസിലെ പ്രതികളായ ഹോട്ടലുടമ റോയ് വയലാട്ടില്, സൈജു തങ്കച്ചന് എന്നിവരുടെ മുന്കൂര് ജാമ്യാപേക്ഷ ഹൈക്കോടതി തളളി. മൂന്നാം പ്രതി അഞ്ജലി റിമാ ദേവിന് മുന്കൂര് ജാമ്യം ലഭിച്ചു. ഭീഷണിപ്പെടുത്തി പണം തട്ടാനാണ് പരാതിക്കാര് ശ്രമിക്കുന്നതെന്നായിരുന്നു മുന്കൂര് ജാമ്യാപേക്ഷയില് റോയ് ആരോപിച്ചിരുന്നത്.
നമ്പര് 18 ഹോട്ടല് ഉടമയായ റോയി ഹോട്ടലിലെത്തിയ യുവതിയെയും മകളെയും ഉപദ്രവിച്ചെന്നാണ് കേസ്. ഫോര്ട്ട് കൊച്ചി പോലീസ് സ്റ്റേഷനിലാണ് കേസ് രജിസ്റ്റര് ചെയ്തിരിക്കുന്നത്. മോഡലുകളുടെ മരണം അന്വേഷിക്കുന്ന സംഘത്തിന് കേസ് കൈമാറിയിരിക്കുകയാണ്. അമ്മയെയും മകളെയും പീഡിപ്പിച്ച് ദൃശ്യങ്ങള് മൊബൈലില് ചിത്രീകരിച്ചു എന്നാണ് പരാതി.
കോഴിക്കോട് സ്വദേശിയായ അമ്മയും മകളും നല്കിയ പരാതിയിലാണ് റോയ് വയലാട്ടിനെതിരെ ഫോര്ട്ട് കൊച്ചി പോലീസ് പോക്സോ ചുമത്തിയത്. 2021 ഒക്ടോബറില് ഹോട്ടലില് വെച്ച് റോയി പീഡിപ്പിച്ചെന്നാണ് പരാതി. പീഡന ദൃശ്യങ്ങള് പ്രതികള് മൊബൈല് ഫോണില് പകര്ത്തി. പുറത്തുപറഞ്ഞാല് ദൃശ്യങ്ങള് സമൂഹ മാധ്യമങ്ങളില് പ്രചരിപ്പിക്കുമെന്ന് അഞ്ജലി ഭീഷണിപ്പെടുത്തിയെന്ന് പെണ്കുട്ടി നല്കിയ പരാതിയില് പറയുന്നു.
പരാതി നല്കിയ സ്ത്രീയും കൂട്ടാളികളും അവരുടെ പല കാര്യങ്ങളും പുറത്തുവരാതിരിക്കാന് തന്റെ ജീവിതം വെച്ച് കളിക്കുകയാണെന്നാണ് അഞ്ജലിയുടെ ആരോപണം. നിരപരാധിത്വം തെളിയിക്കാന് ഏതറ്റം വരെയും പോകുമെന്നും അഞ്ജലി സോഷ്യല് മീഡിയയില് പങ്ക് വെച്ച വീഡിയോയില് പറയുന്നു. എന്നാല് അഞ്ജലിയുടെ ആരോപണങ്ങള് പോലീസ് തള്ളിക്കളയുകയാണ് ചെയ്തത്.
