ചങ്ങനാശ്ശേരി: എന്.എസ്.എസിനെയോ അതിന്റെ നേതൃത്വത്തെയോ വിരട്ടാമെന്ന് ചിന്തിക്കുന്നവര് മൂഡസ്വര്ഗത്തിലാണെന്ന് ജനറല് സെക്രട്ടറി ജി സുകുമാരന് നായര് പറഞ്ഞു. എന്.എസ്. എസിനെതിരെയുള്ള മുഖ്യമന്ത്രിയുടെ പരാമര്ശത്തിന് മറുപടി പറയുകയായിരുന്നു അദ്ദേഹം.
എന്.എസ്.എസിന് സര്ക്കാരിനോട് ഒരു പെരുമാറ്റം ഉണ്ടെന്ന് നാട്ടിലൊരു അഭിപ്രായം ഉയരുന്നുണ്ടെന്നും അത് സുകുമാരന് നായര് മനസിലാക്കുന്നത് നല്ലതാണെന്നുമായിരുന്നു മുഖ്യമന്ത്രി പിണറായി വിജയന്റെ പ്രസ്താവന. സംസ്ഥാന സര്ക്കാരിനെതിരെ എന്.എസ്.എസ് നടത്തുന്ന തുടര്ച്ചയായ വിമര്ശനങ്ങളില് സംശയങ്ങളുയരുന്നുണ്ടെന്നും പിണറായി പറഞ്ഞിരുന്നു. ഇതിന് മറുപടിയായാണ് സുകുമാരന് നായര് ഇന്ന് വാര്ത്താ കുറിപ്പ് പുറത്തിറക്കിയത്.
സംസ്ഥാന സര്ക്കാരിനോട് എന്.എസ്.എസ് ആവശ്യപ്പെട്ടത് മൂന്നു കാര്യങ്ങളാണെന്ന് സുകുമാരന് നായര് വാര്ത്താകുറിപ്പില് അറിയിച്ചു. ശബരിമലയിലെ യുവതീ പ്രവേശനം സംബന്ധിച്ച് വിശ്വാസികള്ക്ക് അനുകൂലമായ നിലപാട് വേണം, മുന്നോക്കക്കാരിലെ പിന്നാക്കക്കാര്ക്ക് 10 ശതമാനം സാമ്പത്തിക സംവരണം കേരളത്തിലും നടപ്പാക്കണം, മന്നത്തുപത്മനാഭന്റെ ജന്മദിനത്തിലെ പൊതു അവധി നെഗോഷ്യബിള് ഇന്സ്ട്രമെന്റ്സ് ആക്ടിന്റെ പരിധിയില് കൂടി ഉള്പ്പെടുത്തണം എന്നിവയായിരുന്നു അവ.
അതില് ശബരിമലയിലെ യുവതിപ്രവേശന വിഷയം ഇപ്പോഴും എവിടെ നില്ക്കുന്നുവെന്ന് ജനങ്ങള്ക്കറിയാം. സാമ്പത്തിക സംവരണത്തിന്റെ പ്രയോജനം മുന്നോക്ക വിഭാഗത്തിന് ഇതുവരെ ലഭിച്ചിട്ടില്ലെന്നും സുകുമാരന് നായര് പറഞ്ഞു. മന്നം ജയന്തി അവധി സംബന്ധിച്ച എന്.എസ്.എസിന്റെ ആവശ്യം നിസാരമായി കണ്ട് സര്ക്കാര് അവഗണിക്കുകയായിരുന്നുവെന്നും വാര്ത്താകുറിപ്പില് വിശദീകരിക്കുന്നു.
സര്ക്കാരിന്റെ പ്രവര്ത്തനങ്ങളെ സംബന്ധിച്ച് എന്.എസ്.എസ്. ഒരിക്കലും പ്രതികരിച്ചിട്ടില്ലെന്നും രാഷ്ട്രീയമായി എന്.എസ്.എസ് ഇപ്പോഴും സമദൂരത്തില് തന്നെയാണെന്നും സുകുമാരന് നായര് വിശദീകരിക്കുന്നു.