ഒഡീഷ : ഒഡീഷയിലെ ജനങ്ങള്ക്ക് ദീപാവലി സമ്മാനം പ്രഖ്യാപിച്ച് മുഖ്യമന്ത്രി നവീന് പട്നായിക്. ചരിത്ര തീരുമാനമാണ് മുഖ്യമന്ത്രി നവീന് പട്നായിക് തന്റെ ജന്മദിനത്തിന് ഒരു ദിവസം മുമ്പ് പ്രഖ്യാപിച്ചിരിക്കുന്നത്. കരാര് നിയമനങ്ങള് നിര്ത്തുന്നതായാണ് പ്രഖ്യാപനം. യുവാക്കള്ക്ക് സ്ഥിര ജോലി നല്കുകയെന്ന ലക്ഷ്യത്തോടെയാണ് തീരുമാനമെന്ന് നവീന് പട്നായിക് വിശദീകരിച്ചു.
സര്ക്കാരിന്റെ ഈ നീക്കം 57,000 കരാര് ജീവനക്കാര്ക്ക് ഗുണം ചെയ്യും. എന്നാല് ഖജനാവില് നിന്ന് സംസ്ഥാന സര്ക്കാര് പ്രതിവര്ഷം 1300 കോടി രൂപ ഇതിനായി ചെലവഴിക്കേണ്ടിവരുമെന്നും മുഖ്യമന്ത്രി പറഞ്ഞു. 2000-മുതലാണ് ഒഡീഷയെ സേവിക്കാന് തനിക്ക് അവസരം ലഭിച്ചതെന്ന് ചടങ്ങില് സംസാരിച്ച പട്നായിക് പറഞ്ഞു. സൂപ്പര് സൈക്ലോണിന് ശേഷമുള്ള സാഹചര്യവും ദുര്ബലമായ സാമ്പത്തിക സ്ഥിതിയുമായിരുന്നു ഏറ്റവും വലിയ വെല്ലുവിളി. സംസ്ഥാനം ഓവര് ഡ്രാഫ്റ്റില് ഓടുകയായിരുന്നു. വേതനത്തിനും വിഭവങ്ങള്ക്കുമായി സര്ക്കാര് റിസര്വ് ബാങ്കില് നിന്നും സഹായം തേടിയിരുന്നതായും നവീന് പട്നായിക് വ്യക്തമാക്കി.
